Johan 1 (John 1)

 JOHAN 1

Johan odhai 1-ko monsongbate bak gni dake sualna man∙a. Skanggipa bak, pod 1-18-onade Prologue ba mai miksonganio ua ia Nama Kattako seaha uani gimin talata. Gnigipa bak, uan pod 19-51-onade, Jisuni jinmana dangdikani ba Public Ministry-ni gimin agansoaniko janapa. Ua bak gnini ning∙oba adita chonchongipa bakrang dongkua. Uarangni gimin talataniko ka∙mao gita niangna man∙gen.  

MAINA NAMA KATTAKO SEA (POD 1-18)

Johan 1:1-18-ko Prologue ine agana. Ia prologue ingipa kattako A∙chikkuona tiktak donnade neng∙a. Proloque-ko mongsongbate skangni poedo segiparang, golponi mongsonggipa bakona sokangna skang jakkala. Niam Bidik gita niatode ian Preamble ingipa gita ong∙gen. Badiaba ki∙tap jekai chanchichipe segipa golpo, fiction ba novel aro gipin ki∙taprang gita niatgenchimode uko Preface ba senokgipani  ‘Aganchengani’ ba ‘Talatchengani,’ ine segipa gita aganna man∙gen. Dakmesokgipa ba Gahon dakgipa gita niatode haida Gaiok ba Ringra Ringsalni talatgipa gita aganna man∙gen. Professor Paulson Pulikottilni agana gitade, namgipa ki∙tap segiparangni seanikode, ‘Aganchengani’ ba ‘Talatchengani’ ingipako poraiaon, ki∙tapni miksonganiko u∙ina man∙a. Ki∙tap segiparang, uamangni aganchenganion maiko sena am∙enga, uko talatani gimin uan ong∙akon. Ia Proloque-oba uandakgipa miksonganioan seakon. Mitam mitam poraigiparang, Johanni sea Nama Kattani miksongakode, Johan 1:1-18-ona poraioan u∙ina man∙a ine agana. Ia Prologue-o ua maiko talata, ka∙mao gita niangna.

Bimang Ong∙na Skangan Kattade Donga (Pod 1-8)

Johan 1:1-2-o, “Chengon Katta gnangchim, aro ua Katta Isol baksachim” (vv 1-2) ine agana. Ia on∙sogimin Sastrooniko, “Chengon,” ingipa kattani gimin an∙ching niate nina. Ian sal ba somoini ong∙bachenganiko u∙igijani ba u∙isokgijaniko miksonga. Uan A∙bachenga 1:1-o, ‘Chengon Isol salgi aro a∙ako ong∙ataha,’ ingipako jaksi ote mesokani gitaba ong∙achim.  A∙gilsako mingsinggipa scientist, Charles Darwin jean Evolution Theory-ko agandilgipa, pilak ong∙atgiminrangni ong∙baaniko, Big Bang Theory ine katta bichongko done, 13.7 billion bilsina skangde a∙gilsak salgisak chong∙motan Universe-kon ba∙kuja-chi∙kujachim ine talata. Ukon A∙chikrangba Silgakon Rangrakon Manekon Piltekon, Aema-Ditdemakon, A∙ni Prem Chini Jim∙jemkon ba∙kuja-chi∙kuja ine uamangni wangal-a∙soani somoio ring∙badria-dokkatchianirango agana. 13.7 billion bilsionisa chonbegipa su∙tota gita dakgipa, jekon mikronchi nikna man∙gijagipa bostu (particle) ong∙kataha. Ua chonbegipa su∙tota gita dakgipako, chasong gitalni scientistrangde ‘God particle’ ine agana, indiba uamangba Isolni giminde mamingba aganani dongja. 13.7 billion bilsio, chonbegipa su∙tota gita dakgipaonisa salgisak a∙gilsak pilakan ong∙katbaaha ine uamang agana. Ia Satroo ‘Chengon,’ ingipaara ua 13.7 billion bilsikoan aganama ma una batama ma komiama, ukoba namede aganna man∙ja. Johan 3:16-o, ‘Isol a∙gilsakna inditan ka∙saaha,’ ine agana. Iano a∙gilsak ingipako Englishode ‘World’ inean pe∙a, indiba Greek kattaode Cosmos inesa sea. Ian, World-na bateba apalbata ine nikna man∙gen. Cosmos ingipara, a∙gilsak, salgisak, sako bilgipa, chio rogipa ba balbogipa, sal jajong, askirang, dingtang dingtang planetrang,  somoi, bilsi-kari, bangbang aro una agreba chansok-mingsokgijaniko miksongachim. Ukon Englishchi Universe ine agantaia. Ua Universeko Isolara chengon ong∙ataha. Chengonni minggipin A∙chik kattade a∙bachengaba ong∙taia. Uko ra∙chapen man∙chenga, dakchenga, ruchenga, cha∙chenga ineba agana, indiba uara basakoni mancha uko darangba aganna man∙ja. Uni minggipin English kattade eternity ine agana aro uara basakoni mancha a∙bachenga, basako bon∙gen, ukoba aganna man∙gijagipasa ong∙a. Uko niatode ia Chengon ba In the beginning ingipara, Big Bang Theory-o Scientistrangni 13.7 bilsionisa ingipana skangna kraa; maina chengon ingipade bilsi-kariko kapna man∙gipa ba channa man∙gipaba ong∙ja.

Minggipin an∙ching iano Katta-ni giminba niate nina. Ia Katta ingipako Greek kattaode Logos minga. Greekrang, pilakna bate dal∙batgipa, pilakkon dakgipa rugipa, Supreme Being donga ine bebera∙a. Uamangni nikanioba uan Rongtalgipa ong∙achim. Uamangni chanchiani ba bebera∙ani gitade Isol ba Supreme Being-ara rongtalani gimin darangba Uni dongramona gadona ba maldona man∙ja, dangtapna aro niknaba man∙jachim. Ua Supreme Being ba Isolara rongtalgipa ong∙ani gimin, an∙tangba a∙gilsakona ba pilak ong∙atgiminrangona re∙bana man∙jachim ine uamang bebera∙achim. Ua Supreme Being ba Isolna bate  chonbatgipa Gisikba donga ine uamangba bebera∙a aro ukon uamang Logos ine minga aro ukosa A∙chikkuo Katta ine mingskaa. Ua Logos-ara namen gisik seng∙gipa jean Wisdom, knowledge, ba Sophia ong∙ani gimin pilakkon jojrangjrang nikataiachim ine agana. Uara, manderangni ba pilak ong∙atgiminrangni dongramna bate chubatao, indiba Isolni dongramni ka∙maosa dongachim ine uamang bebera∙achim. Uan, pilakkon nirok-simsakgipa Guiding Spirit gita ong∙achim ine bebera∙achim. Uni giminsa uamang ua Logos gita ong∙na skachim. Logos gita ong∙na skesa Greekrang seng∙aniko am∙e, bang∙batan Philosopher-rang ong∙achim. Uamangni bebera∙anio, gisik seng∙gijagipade maming saloba Isolko grongna man∙jawachim. Ua Logos ingipa kattaonisa logic ingipa kattaba ong∙katbaaha.

Johan, ua Greekrangni jakkalgipa Logos ba Kattako jakkalean, Isolni mande pil∙e re∙baaniko aganna jakkalskaaha. Ua Logos ba Kattaara, badiaba bilsio nakatbagipa ong∙ja, indiba chengonian dongachim. Ua mandena bate chuao, Isolna bate onao donggipaba ong∙ja indiba Isol baksaan dongachim. Uan, gipinba ong∙ja, Uaara Isolanchim ine ua talataha.

Pod 3-ode, “Uachin pilakan ong∙aha; aro uni griode ong∙giminoni ong∙gipa mingsaba  dongja,” (Pod 3) ine janapa. Iano, “Uachin,” ingipara Logos ba Word ba Katta ong∙a. Una agreba ua Kattaara maiko dakachim, uko mesokani ong∙a aro ‘Pilakan,’ ingipaara pilak ong∙atgiminrang ba Universe-ko miksonga. Universe ba pilak ong∙atgiminranga banoniba bimik nabaaia ong∙ja, indiba uniba ja∙pang-ja∙dil donga ine mesokani ong∙achim. A∙chikrangni aganbewalao, ‘Darangba a∙pruonide ong∙katja,’ ine aganani donga. Uni ortode darangnian ma∙a-paa donga, uni giminsa ‘Jika-dea bobil, ma∙a-noa ja∙dil,’ ineba agantaia.Uni ortode an∙ching pilakan ma∙a-paaonisa atchia aro maibakae jika-dea namjaode ma∙a-noachinan sokangtaigen ine miksongani ong∙achim. Ia on∙sogimin Sastroo Johanni talatani gitade, an∙chingni ja∙pang-ja∙dilde Lgos ba Kattasa ong∙a. An∙chingsan ong∙ja, indiba a∙ni-prem chini jim∙jem ba Universe gimikni ja∙pang-ja∙dilde Logos ba Kattaan ong∙a.

Pod 4-ode, “Unon janggi gnangchim, aro ua janggi manderangna seng∙a ong∙achim,” (Pod 4) ine janapa. Iano janggi ingipara maia? Ian janggi silchiko miksongama ma a∙gilsako donggipa janggiko miksongama? Dr. S.R.Marakni aganani gitade, ian a∙gilsako donggipa janggi ba life-ko miksongachim. Ua janggiara Logos ba Kattao dongachim aro uan seng∙a ong∙achim.  Uni ortode uno maming ja∙gitotani aro simtekani dongjachim. Jemangan ua janggiko man∙a, unoba ja∙gitotani, simtekani aro matnangani dongjawachim.  

An∙ching pod 5-ko poraiode, “Seng∙a andalao teng∙sua; aro andala uko rim∙jachim,” ine janapako nikgen (Pod 5). A∙chik ma∙gitcham-pagitchamrangni agangipa kattao donatode, Maneko dakchengmitingo Pilteko (a∙ko-chiko) ruchengmitingo, a∙gilsakkoara andalani ganggopengachim ine aganna man∙gen. Unon Isol Ai Janggako Reding Bandako (salko) ong∙ate seng∙aniko ra∙baaha aro uko andalani champengna man∙jaha. Apsan daken, ia ga∙akgimin a∙gilsako, satanni bilni kam ka∙ani a∙sel andalengachim. Ia ga∙akgimin a∙gilsakona, ua Katta ba Isolan re∙baaha aro Uan be∙en pil∙anichi ba mande pil∙e atchianichi seng∙ani ba jokaniko ra∙baaha. Ua Jisu Kristoni ra∙bagipa ba on∙gipa seng∙aniko satanni songnok champengna man∙jaha.

Pod 6-ode, “Isolni watata mande saksa re∙baaha, uni biming Johan,” ine agana (v.6). Iano Johan Napbolatgipani bimingko janapaniara, Isol uko seng∙ani gimin sakki on∙china watataha ine mesokani ong∙a. Johanni ortoara Isol ka∙sachakgipa ba Isolni on∙ani ine ong∙achim. Ua, seng∙ani ba Jisu Kristoni gimin sakki on∙aha. Uni kamara, Niam Gitchamo katchinikgiparangni kamrang gitan ong∙ani gimin, saoba saobarangde uko Seng∙a ba Kristo ine chanchiachim. Indiba, Johanara mandesan ong∙aiani gimin, Seng∙ade ong∙na man∙ja, indiba sakki on∙gipasan.

Pod 7-ode, “Antangchi maikai darangan bebera∙na man∙gen, seng∙ani gimin sakki on∙na ine ua sakki ong∙na re∙baaha,” ine agana (Pod 7).  Johanni sea Nama Kattao, Johan Napbolatgipaan, Seng∙ani gimin sakki on∙giparangoni skanggipa ong∙a. Johanni sea Nama Kattao, sakki ingipara, Kachario bichal ka∙o jakkalgipa katta ong∙a, aro uan, mikrontangchi nike aganpagipako miksonga. Johan Napbolatgipa, Isolni parape∙ani seng∙aniko aro, ‘A∙gilsakni Seng∙ani’ bimang ba Personko sakki on∙a (8:12). Johan Napbolatgipani kam ba functionara, ua seng∙ani gimin sakki on∙anikon mongsongbate ba stress ka∙e agana. Johan Napbolatgipani kamara, Jisuko nie bebera∙china skiani ong∙a aro Johanni sea Nama Kattako segipani miksonganiba uanchim.

Pod 8-ode, “Uan Seng∙a ong∙jachim, indiba seng∙ani gimin sakki on∙na re∙bara,” ine janapa  (v.8). Johanko mitam mitam manderangde Seng∙a ba Jokatgipa ine chanchigiparangba dongachim. Uni giminsa Nama Kattako segipa Johan, changni chang uko Seng∙a ong∙ja, indiba seng∙ani gimin sakki on∙na re∙bagipa ine mesokaha. Uni siani ja∙manoba mitamde uko ja∙rikkuengachim ine agana. John Morisni agana gitade, ia somoioba, Salgipeng Baghdad jolo Mandai minggipa dolrang donga. Uamangde Kristianba ong∙ja, indiba Gnostic, jean seng∙ani ba u∙ianichi jokaniko am∙gipa dolrang ong∙achim. Uamangni aganritingani gitade, uamangni atchu-ambirangde Johan Napbolatgipako ja∙rikgiparang ong∙a ine agana.

Bebe ba Seng∙ani Sokbaa (Johan. 1: 9-13)

Pod 9-ode, “Pilak mandena seng∙gipa, ua seng∙a chong∙mot a∙gilsakona re∙baengachim,” ine agana (v.9). Johanni somoio ia a∙gilsako an∙tangtangko seng∙a ine mesokgiparang bang∙achim. Uamangoni Greek philosopherrangba dolsa ong∙achim. Dolgipin ua somoio an∙tangtangko seng∙a ine mesokgiparanga, Jihudi toromni dilgiparang, mongsongbate Pharisi Sadukirang ong∙achim. Johanni nikanio, uamang seng∙a chong∙mot ong∙ja. Ua Greek philosopherrang aro Jihudi toromni dilgiparangoba bang∙a ja∙gitotanirang, dakmikanirang bang∙en donga aro uno jokatani dongjachim. Jokataniko on∙na man∙gipa seng∙a chong∙motde, Logos ba Katta jean Jisu Kristosa ong∙achim.

Pod 10-ode, “Ua a∙gilsako gnangchim, aro a∙gilsak uachin ong∙aha, indiba a∙gilsak uko u∙ijachim,” ine agana (10). Kattachi ba Jisuchian a∙gilsakko ong∙ataha, indiba ga∙akanichi ong∙siaha. Ua ga∙akgimin a∙gilsakona be∙en pil∙anichi napaha. A∙gilsakni manderanga, ga∙akanichi ba papchi andalako man∙aha. Uni gimin, ua a∙gilsako teng∙sugenchimoba, gisikni bidingo kana ong∙e, uko nikjaha ba u∙ijaha.

Pod-11-ode, “Ua an∙tangniona re∙baaha, indiba an∙tang manderang uko ra∙chakjachim,” ine agana (11). Uni ia ga∙akgimin a∙gilsakona re∙bae an∙tangni dakgiminrangko ba an∙tang mandeko nieon, uni manderang uko ra∙chakjaha. Uni manderang ingipa uan, Isolni dakgimin ong∙a. Mongsongbate iano aganani Jihudirangna ong∙bata. Uamang, minggnio Uni manderang ong∙aha. Skanggipao uamang, Isolni dakgimin ong∙ani gimin, Uni manderang ong∙aha. Gnigipao, uamangko Isol dingtangmancha, jatrangni giseponiko baseahani gimin Uni manderang ong∙aha. Uni a∙selan uamang Ukon nichaksoenga, indiba Ua re∙baahaode, Uko ra∙chakna man∙jaha. Uan, ga∙akgimin ba papchi mikandalatani a∙sel ong∙achim.

Pod-12-ode, “Indiba badita mande uko ra∙chakaha, ua uamangna, chong∙motan uni bimingo bebera∙giparangna, Isolni de ong∙china bil on∙aha,” ine agana (12). Jegalaming nangtinggrikgipade ra∙chakanian ong∙a. Uni a∙gilsakona re∙baon, pilakande Uko jegalaijaha; saoba saobarangde uko ra∙chakaha. Iano ra∙chaka ingipara bebera∙aniko miksongachim. Chong∙motan Jisuan a∙gilsakona re∙bae, nang∙ni ba angni papni a∙sel siaha ine bebera∙ani ong∙achim. Dr. Thomas L. Constableni agana gita, Johanni sea Nama Kattao bebera∙a ingipara Jisu baksa nangrimani ba relationship dongani ong∙achim. Uo bebe∙ra∙giparangna Uaba on∙aniko (gift/ reward) on∙skaaha aro uara Isolni de ong∙china bil ba auhorityko on∙ani ong∙achim.

Pod-13-ode, “Iamang an∙chioniba, be∙enni skaoniba, mandeni skaoniba atchijachim, indiba Isoloni,” ine agana (13). Mande saoba toromigipa mandeni degipa ba su∙gipa ong∙aiani gimin Isolni depante ba demechik ong∙na man∙aija. Jihudirang, Abrahamni de-su∙drang ong∙ani gimin, uamang Isolni dedrang ine rasong chaachim. Beben be∙enni gita uamang Isolni nikao toromi ine chanako man∙gipa Abrahamni de-su∙drang ong∙bebea, indiba gisikni bidingode ong∙kujachim. Gisikni bidingo Isolni de ong∙nade Jisuko ra∙chakna ba kosakoni atchina nangachim. Iano mandeoni ingipako Greek kattao Andros ine dona aro uan me∙asako miksongachim. NIV Bible-ode uko husband ba segipa ine pe∙a. Mande, be∙enni gitade, segipa aro jikgipani nangrimanichi atchia, indiba gisikni bidingode, gisik baksa nangrimanichi ba Jisuko ra∙chakanichi ba bebera∙anichisan man∙aiachim.

Be∙en Pil∙gipa Katta (Johan. 1: 14-18)

Pod-14-ode, “Aro ua katta be∙en pil∙aha, aro ka∙sara aro bebean gape an∙chingni gisepo dongaha; aro Pagipaoni saksa kamkam Depanteni rasongko gita, an∙ching uni rasongko nikaha,” ine agana (14). 2019 bilsio India Baptist Mission Summit Hyderabad-Secondarabado tom∙aniona chinga re∙angaha. Hyderabadni mingsinggipa biaprangoni, Charminar-ba damsa ong∙ani gimin chinga ukoba nina chanchiaha. Ua somoio mikka jime waani gimin biaprang mitchi mitchi dakana chinga ong∙one nibajaha. Greekrangni nikanio, Isol maming saloba a∙gilsakona ong∙onbana man∙jachim, maina uara rongtalgipa aro a∙gilsakara rongtalgijagipa ong∙achim. Indiba Johanni sea Nama Kattao talatani gitade ua rongtalgipa Isolan Katta ba Logos ong∙a  aro Uan Jisu Kristoba ong∙achim. Uara chengonin Isol baksa donggipa, Isolni dongramo donggipa aro Isol an∙tangan mande pil∙e, Mariamni oko atchie, mandeni pilak duk sukkon u∙iaha. Uni ortode Isol baksa nangrimna ba jokataniko man∙na, Logos gita ong∙na nangjawaha, seng∙gipa matgipa, brigipa dotdalgipa philosophersan ong∙aigija, wanga jadamangba, ua be∙en pil∙gipa Isolo bebera∙ode jokataniko man∙a ine talatengachim.

Pod 15-ode, “Johan uani gimin sakki on∙a, aro inwate ina, Angni ja∙man re∙bagipa angna skang ong∙aha; maina ua angna skangon dongachim ine jeni gimin anga aganaha, ua ian,” ine janapa (v.15). Jisuni gimin sakki on∙gipa, Jisuni sninggipa jean Johanni sea Nama Kattako segipa ong∙a. Un baksana, sakgipin Johan, Johan Napbolatgipaba Jisuni gimin sakki on∙aha. Johanni sea Nama Kattao, Jisuan Isol ong∙a ine agangipa sakdok manderangoni saksade Johan Napbolatgipa ong∙a. Uamangara Nathaniel (Johan.1: 49), Pitor (Johan.6:69), Jisuni an∙sengatgipa kana mande (Johon.9:35-38), Martha (Johan. 11:27) aro Thomas ong∙a (Johan.20:28). Johan, mandeni gita Jisuna skang atchia aro kam ka∙aba skang. Mandeni bewalo skang atchigipa, bribatgipa, wakki nionchenggiparang pangnan an∙tangna bate dambebatgipako mikchepesa ra∙bata. Skia man∙batomangba, mija mine atchigipa ambitangming tukugipa ine mikcheperang ra∙a. Uandakgipa chanchiani dongode, Johanba Jisuko mikchepe ra∙genchim, indiba ua uko dal∙bate ra∙aha. Ua, Jisuko una skangan Pagipa baksa donga ine ra∙chakaha.

Pod 16-ode, “Maina an∙chinga darangan Uni gapaoniko man∙aha, aro ka∙saani pal ka∙saako,” ine agana  (v.16). Iano agangipa ba speaker-ara Johan Nopbolatgipa ong∙ja, indiba Johanni Nama Kattako segipa Johan ong∙achim ine nikgen. Uni talatani gita, Jisu Kristoara ka∙saanian gapgipa ong∙a. Uni suakpilgipa ka∙saaniko an∙ching man∙aha. Iano ka∙saani pal ka∙saako ingipara uan, ka∙saani mingsani ja∙mano minggipin ka∙saaniko man∙ani inani pal ong∙achim. Uan, Uni agansokpilgijagipa ka∙saaniko miksongachim. English kattao uko grace upon grace, ine agana aro uko minggipin A∙chikkuona donatskaode, ka∙saani kosakoba ka∙saani, ine aganna man∙gen. Sagalni chipakkorerang satpakani ja∙manoba satpaktaia gitan, Isolni ka∙saaniara, ka∙saani ba pattiani ja∙manoba, ka∙saani ba pattianikoba on∙achim. Mitam mitam sandie nigiparangni nikani gitade uan, dingtang dingtang somoio, biapo, ba obostaoba Isolni ka∙saaniko man∙aniko miksongachim ine agana. Ia ka∙saaniara an∙ching sakantinan ong∙a. Iandakgipa agansokpilgijagipa ka∙saaniko na∙a cha∙tote niahama? Chatote nikkujaode, uko cha∙totna nang∙na maiba champengani dongama?

Pod 17-ode, “Maina Mosechi niamko on∙aha, ka∙sara aro bebe Jisu Kristochi ong∙aha,”ine agana (v17). Moseni somoio Isol, Israel manderangna niamko on∙aha aro uan niamko manie janggi jokanina ong∙achim. Jisu Kristoni a∙gilsakona re∙baani somoi dipet Isol manderangna ka∙sachakaniko on∙aha. Niamara Isolni nangnikani ba Isolni standard gita manie janggi jokanina ong∙a, indiba ka∙saani ba ka∙sachakania, mandeni amgijaniko dakchakani ong∙a. Uan, mandede jedake jotton ka∙oba man∙jaha, indiba Isolsa uko dakchakaha inani pal ong∙achim.  Niamko on∙ani somoioba ka∙saani donga aro ka∙sachakani somoioba niamde donga. Mesokna gita, boli on∙aniko Isolni ra∙chakanian Uni ka∙saaniko mesokani ong∙a. Uarangko niate, legal age ba niamni somoioba, mandeni jokna man∙anide Isolni ka∙sachakani ba grace-chian ong∙a aro gracious age ba ka∙sachakani somoioba mandeko jokataniara ka∙saanichian ong∙a ine aganna man∙gen.

Pod 18-ode, “Darangba Isolko mamung saloba nikkuja; Pagipani ka∙bako donggipa saksa kamkam Depantean uko parape∙aha,” ine agana  (v.18). Niam Gitchamo aro Niam Gitaloba, Isolko dingtang dingtang bimango nikgiparang, donga; indiba chu∙gimik Isolni gimin u∙igipa ba nikgipade dongkujachim. Isolko an∙ching mikronchi nikna man∙gijania, Ua dongjani ba Ua chong∙motgipa ong∙jani giminde ong∙ja, indiba Ua Gisik ong∙ani giminsa, mandeni mikronara Uko nikna chu∙ongjachim. Uko chu∙gimik nikgipa aro u∙igipade, Pagipa Isolni ka∙bako donggipa, jean Pagipa baksa namen ma∙bakgipa ba intimacy ong∙gipasa ong∙a aro uara gipin ong∙ja, indiba Jisu Kristoan ong∙achim. Johan,  uni Prologue-ni a∙bachenganioba Jisuni Isol ong∙anichi a∙bachenga aro Prologue-ni bon∙kamaoba, Jisuni Isol ong∙anikon mesoktaia. Uni gimin uarangko niate, Johanni ia Nama Kattako seaniara, Jisuan Isol ong∙a ine bebera∙e, janggi jokaniko man∙china ong∙a ine aganna man∙gen.

MANDE JINMANA DANGDIKGNIKO AGANSOA (JOHAN 1:19-51)

An∙chingni kam ka∙ani aro dangdikanio, basakobade mande bang∙gija seokgiminrangna aro basakobade jinmana dangdikna nanganirangba donga. Mande bang∙gija, seokgimin manderangna dangdikaniko Private Ministry aro jinmana dangdikanikode Public Ministry ine aganna man∙a. Jisuni ia a∙gilsako dangdikanioba ia minggni, chong∙moan Private Ministry aro Public Ministry donga. Ia on∙sogimin Sastroni bakode, Uni jinmana dangdikani ba Public Ministryko agansoani, Uni gimin sakki on∙ani ba mesoksoaniko nikna man∙a.

Bebegipa Seng∙ani Sakki (1.19-28)

Pod 19-ode, “Aro na∙a sawa ine sing∙na Jihudirang Jerusalemoni kamalrangko aro Levirangko uni mikkangona watatoa, Johanni sakki ia,” ine agana. Ia podo Johan Nopbolatgipa, an∙tangni Jisu baksa nangrimanio sawachim, uko mesoka. Senoptic Gospelo (Mati.3:5-6) Johanni kamrangni mingsinganiko janapa aro ianan Jihudirang Uko sandirikkitahachim. Uamang Uni kamrangko nike, haida Sanhedrinonin, Kamalrang aro Levirangko watataha. Kamalrangara, Aaronni de-su∙drang, jemangan mongsonggipa toromni kamko ka∙gipa ba dilgiparang aro theologianrang ong∙achim. Levirangba, Aaronni de-su∙drangoni saksa, Levini de-sudrangoni ong∙achim. Uamangba kamalrangko torom noko, Isolko olakkianio, mongsongbate, doka-damanirango dakchakachim. Ia Jihudi ingipa, mongsongbate Judea ba Jerusalem joloni Jihudirang, jemangan skia man∙gipa aro namen Jihudi toromni riti-dakbewalrangko rongtale rakkigiparangko miksongachim. Ua Jihudirangan, bang∙bata salon Jisu baksa nanggrikrongachim.

Pod 20-ode, “Unon ua jegija ku∙rachakaha; Anga Kristo ong∙ja ine, ua ku∙rachakaha,” ine janapa. Ia podoba Johan Napbolatgipa an∙tangko Kristo ong∙ja ine agantaiaha. Kristo ingipa uan Ibri ku∙siko Mesiah ingipa ba Nongako Man∙gimin ingipaming apsan ong∙achim. Ua ianoba, jedakode manderang ugita Jisuko bebera∙na man∙gen ba bebera∙gen, uani giminsa agane on∙engachim. Mingsa gita niatode uan, ua jerangko dakaha, uan uni bilchi ong∙ja, indiba jeni gimin ua aganengachim, uani giminsa uko dakna ba ka∙na man∙aha ine mesokani ong∙achim. Johanko jedake manderang Mesiah ba Jokatgipa ine chanchichipa, basakobade haida an∙chingni dangdike on∙anioba, maiba nama kamko ka∙pana man∙ode, jekai sakoba an∙sengatna man∙ode, kangal-cholgrirangna dakchakna man∙paode, uarangko an∙tangni bilchi man∙a gita nike, rasong chana skanirangba nabaanirangde dongaia. Manderangba uandakgiparangko nikahaon, ‘amikka pamongni bi∙anichisa namaha,’ ingiparang dongaignok. ‘Amikka missionarysa namatna man∙a,’ ine aganbagnok. Unode, Isolni bilkon an∙tangchi ka∙e namata gita chanchimanbagnok. Uandake dakmajoanirang, Johanonaba sokbaa, indiba ua pilakkon, an∙tango galgija, Jokatgipako mesoke on∙gipa gitasan aganaha. An∙chingni kamrangoba, maiba namako ka∙na man∙paode uan, Jokatgipako ba Jokatgipani kamrangko mesoke on∙gipasan ong∙paaigen. Iana an∙ching rasong chana nangjawa.

Pod 21-ode, “Unon uamang uko sing∙aha, Indide mai? Na∙a Elija ong∙ama? Unon ua aganaha, Anga ong∙ja. Na∙a ua Katchinikgipa ong∙ama? Ua aganchakaha, ong∙ja,” ine agana. Johan, an∙tangko Jokatgipa ba Mesiah ong∙ja ine aganahaon, dilgiparang uko Elija ong∙na nanga ine chanchichipaha. Danielni ki∙tapoba Mesiahni mikkang pa∙ani gimin janapani dongani gimin, Jihudi dilgiparang, Uni salko gisiko nangen nichaksoachim (Daniel.9:25). Malakini ki∙tapoba Elijani re∙bapilani gimin aganani dongachim (Malaki.4:5-6). Jastin Martyr-ni Apology ingipa ki∙tapo janapani gitade, Elija Mesiahko to nongna re∙bapilgen ine Jihudirangni bebera∙ani dongachim. Una agreba Johanni ganding-chindingba Elijani ganding-chindingming apsanangachim. Uan, ramramgipa (simple) ganding-chindingko gangipa ong∙achim. Haida uni a∙selan umang Johan Napbolatgipako, Mesiah ba Jokatgipa ong∙jaode, Elijade ong∙telna nanga ine chanchichipahakon; indiba ua Elijaba ong∙ja ine aganchakaha.

Gittamgipao Jihudi dilgiparang, Jokatgipaba ong∙jaode, Elijaba ong∙jaode, Katchinikgipade ong∙na nanga ine chanchichipaha. Uan Isolni Mosena, ugita dakgipa katchinikgipako ong∙katatgen ba watatgen ine agangipa ong∙na nanga ine uamang chanchiahakon (Deuteronomy.18:15-18). Ua katchinikgipaan, uamangna gital parape∙aniko on∙gen, aro uamangni neng∙nikani ba sinjetaoniko, gital re∙ongkatdiltaigen ine uamang bebera∙ani dongachim ine Eugine H.Merril agana. Unon ua, uamangni ru∙ute nisengsoenggipa, jean Mosena Isolni agananggipa katchinikgipade ong∙ja ine uamangna aganaha. Ianoba ua, an∙tangko maming gaora dakani gri, an∙tang jena re∙baa, ukosa aganaiachim.

Pod 22-23-ode, “Uni gimin uamang una aganaha, chingko watatgiparangna chinga maikai aganchakna man∙gen na∙a sawa? Na∙a an∙tangni gimin badine ina ? Ua aganaha, Gitelni ramako dimbrengatbo ine bakrao aganprakgipa saksani ku∙rang anga ong∙a, jekai Isaia Katchinikgipa aganaha,” ine janapa. Jihudi dilgiparangni sing∙anina, ua katchinikgipa ong∙oba, uamangni ru∙ute nisengsogipa katchinikgipade ong∙ja, indiba Gitelni ramako tarisogipa katchinikgipa ba ku∙rang inesa aganaha. Uan, Isaia katchinikgipani ki∙tapo agangipako janape ba mesoke aganani ong∙achim. Ua Isaia 40:3-o agangipa katta, jean mesianic prophecy ba Jokatgipani gimin katchinike agangipa kattan ong∙achim (Mat.3:3; Mark.1:3, Luk.3:4). Uano, Isolni rasongko Jokatgipa ba Mesiah re∙baahaon parape∙gen ine agansoachim (Isaia.40:5). Ua katchinikgipani kattako ra∙e Johan agangenchimoba, ua an∙tangko Katta ong∙ja, indiba ku∙rang, jean ua Katta ba Jokatgipa ba Mesiahni gimin agangipa ba uko mesoke on∙gpa ine mesokaha. Ua somoio Johan, jedake Jokatgipako manderangna mesoke ba jaksi ote mesokaha, an∙ching Kristoo bebera∙gipa sakantiba, dingtang dingtang manderangna, Kristoko mesoke ba agane on∙na nangengon, na∙ara maiko dakskagen?

Pod 24-o, “ Aro watatgiminrang Pharisirangonin ong∙achim,” ine agana. Johanni gimin sing∙sandina watatgiparangara Pharisirang, jemangan niamko u∙igiparang aro Sastro skigiparang ba pe∙giparang ong∙achim. Uamang niamko u∙ian baksa, ua niamrangko kingkot rakkina jotton ka∙giparang ong∙achim. Uamang, Johanni an∙tangko Jokatgipaba ong∙ja, Elijaba ong∙ja aro ua katchinikgipaba ong∙ja ine aganchakahaon, niamko pe∙gipa ine chanchichipani sokbaaha.

Pod 25-ode, “Aro uamang sing∙e uko aganaha, Na∙a Kristo ong∙jaode, Elijaba ong∙jaode, aro ua katchinikgipaba ong∙jaode, indide maina baptize ka∙ata?” ine janapa. Johanni napbolatania, gisik pil∙anina aro papko watanina ong∙achim. Uamang an∙tangtangko gisik pil∙na nanggipa ine chanchijachim. Gipin jatrangsa gisik pil∙na nanga ine uamang chanchiachim. Gipin jatrang Jihudio napna skode, me∙asarang bigil rasotna nanga aro me∙chik aro me∙aba nopbolna nangachim. Uamangni bebera∙ani gita, uandake napbolatna man∙gipade escatological figure ba bon∙kamgipa salrango nakatnagipa mandesa bil ba authorityko man∙achim. Uamang, Johanko, uamangni nisengsoenggiparangoni saksaba ong∙jaode, napbolatna bil ba authorityko man∙gipa ong∙ja ine chanchiachim. Uni giminsa uamang uni napbolatani giminba sing∙aha.

Pod 26-27-ode, “Johan uamangna aganchake inaha, Anga chio baptize ka∙ata. Jeko na∙simang u∙ija, Chong∙motan angni ja∙man re∙bagipa, jeni ja∙kobni buduko engna anga kraja, uan na∙simangni gisepon chadengenga,” ine janapa.

Johanni napbolatanina, Pharisirang, uni bil ba authorithyko scrutiny ka∙aha. Unon ua, uni napbolataniko divine authorithy ine ra∙chakgipa saksa dal∙gipa-chugipa mandeko uamangna aganaha aro uara Jisu Kristoan ong∙achim. Skangni rabbirang, Isolni kattarangko skia, indiba uamangna dormahako on∙jachim. Sninggparangsa, uamangna dingtang dingtang cholrangchi dangdike on∙a, indiba uamangba gadang dongachim. Uamangoni ja∙kopni buduko (juta lace) engtimgiparangan chonbatgipa ong∙achim. Johanni bil ba authorithyde uandake chonbatgipa kamko ka∙namangba krajachim. Uan (Jisu) namen dal∙gipa-chugipa ong∙a ine aganani ba mesokani ong∙chim. Uandake dal∙gipa-chugipa, Jokatgipa ba Mesiahan, uko divine authorityko man∙gipa ine ra∙chaken napbolaha ine ua aganchakaha.

Pod 28-ode, “Jordanni nalsachi, Bethanyo, jeo Johan baptize ka∙tengachim, uano iarang ong∙aha,” ine agana. Jisuni a∙bachenge kam ka∙gipa biapde, Jordanni saliram jol ong∙achim ine Dr. D.A.Carson agana. Ia on∙sogimin Sastroode Jordanni nalsa ine janapa aro uan Jordanni salgipengchipak ong∙skaa ina. Ua biapko Bethany minga ineba janapa, indiba uan, Johan 11-12-o, janapgipa Martha aro Mariamni songde ong∙ja, gipin biapsa ine Dr. Thomas L. Constable agana. Bethanyni ortoara, House of depression ba duk ong∙gipani nok ine ong∙achim.

Bimang Pil∙gimin Seng∙aniko Mesoka (Johan.1:29-34)

Kosako an∙ching Johan Napbolatgipani, Jisuni gimin sakki on∙aniko nikbamanaha. Ia on∙sogimin Sastrooba ua, Jisuni giminan, Uko Isolni Mes Bi∙sa, chong∙motan, a∙gilsakni manderangna boli on∙chake manderangni papko gimaatgipa ine Jinmana parakaha. Iani gimin an∙ching niange nina.

Pod 29-o, “Uni sal sao Johan an∙tangona Jisuni re∙baako nike aganaha, Hiawa nibo, Isolni Mes Bi∙sa, a∙gilsakni papko ra∙anggipa,” ine agana. Ua somoio Johanni gimin sing∙sandigiparangba re∙bapilahakon ine an∙ching chanchiatna man∙a. Unon, Jisuba tiktak, Johanchipakna mikkangen re∙baengachim. Uko niksoe, ua uko sing∙sandigiparangna aro jinmana ua Jisuko, Isolni Mes Bi∙sa ine aganprakaha ba mesokaha. Dr. Merrill C. Tenney-ni agana gita, ‘Mes Bi∙sa’ ingipara, dosi ba ong∙siani griani (innocent), darangni ge∙etani gri an∙tangko on∙chakani (voluntarily sacrificial), nangrimpilanina on∙skaani (substitution atonement), aro mes bi∙sani an∙chini a∙sel watchanganiko man∙na gita piokani bil (redemptive power) dongachim (Re∙ongkata.12:21-27). Jihudirangni bebera∙ani aro nichaksoani gitade, uamangni Jokatgipa ba Mesiahara, Israelrangkosan jokataigenchim, aro uan, gipin jatrangni sinjetaoniko ba sason ka∙aoniko, mongsongbate, sasonni bidingo ba politicallysa ong∙achim. Uandakgipa chanchiaoni Johan dingtange aganaha. Ua Jisuko Jokatgipa ba Isolni Mes Bi∙sa, Israelrangni ba Jihudirangni papko ra∙anggipa ine aganaigija, a∙gilsakni papko ra∙anggipa inesa aganaha. Uan, Isolni darang mande ba jatna ka∙saaniko mesokachim. Uan, Isolni darangkoba mikkang nitegijaniko mesokaniba ong∙achim. Israelrangni Jokatgipako an∙tangtangnasan chanchia gita, basakobade an∙ching bebera∙giparangba, an∙tangtangnasan namgniko on∙gipa gita chanchinaba man∙aia. Haida iani a∙selan basakoba an∙chingni sakgipinrangna kam ka∙na skani, sakgipinna dakchakna skani, mongsongbate gipin jatrangnade maming namako dakna skani donggija gita nika. Iani a∙selan an∙ching gipin jat ba manderangnade ka∙sana man∙gija gita nika. Indiba Isolde Israelrangnisan, an∙ching A∙chikrangnisan ong∙aigija, Banggalniba, Nepalniba, A∙jongniba, Roriniba, Kotchuniba, bigil gipokgipaniba, bigil gisimgipaniba, skia man∙gipaniba, skia man∙gijagipaniba, jat dal∙gipa, jat chongipaniba Isol, ong∙a. Ua darangnin Jokatgipa ong∙a.

Pod 30-ode, “Angni ja∙man re∙bagipa angna skang ong∙aha; maina ua angna skangan dongachim ine, jeni gimin anga aganachim ua ian,” ine aganskaa. Ia on∙sogimin Sastroo janapani gita, Johan uko sing∙sandina re∙bagiparangna, Jisuni gimin, Uan Jokatgipa, Uan a∙gilsakni papko ra∙anggipa, Uan Isolni Mes Bi∙sa ine aganmanaha aro uni aganako knae uamangba kamalrang aro Levirang baksa agangrikaha. Uni giminsa ua Jisuni re∙baako nikahaon, ua Mandeni giminan ua aganengachim ine uamangna aganaha. Uan, A∙chikrangni matchako golpoode matcha sokbaaia, mongmako golpoode mongma sokbaaia, me∙mangko golpoode me∙mang sokbaaia ine agangipa gita dakangaiaha.

Pod 31-33-ode, “Aro anga uko u∙ijachim; indiba Israelrangna maikai uko parape∙gen, iani gimin anga chio baptize ka∙atna re∙bara. Aro Johan sakki on∙e aganaha, Anga Gisikni paroa gita salgioni ong∙onako nikaha, aro ua uni kosako dongaha. Aro anga uko u∙ijachim, indiba chio baptize ka∙atna angko watatgipa, uan angna aganaha, Jeni kosako na∙a Gi∙sikni ong∙onako aro dongako nikgen, uan Gisik Rongtalgipao baptize ka∙atgipa,” ine agana. Johan Napbolatgipa aro Jisu, mande gitade apsan maharian ong∙achim (Luk.1:36); indiba ua, Isolni parape∙na skangde Jisuko Jokatgipa ine u∙ijachim. Haida ua una skangde, “Angni jonga-grian, angan wakki nionchenggipa,” ine uko chonbate ra∙enggen ba chanchienggenchim. Ua Jisuko napbolatani somoiosa uko Jokatgipa ine u∙iaha (Matt. 3:13-17; Mark 1:9-11; Luk 3:21-22). Johanni Jisuko napbolatani gimin, Nama Kattako segipa Johan sejaha; indiba iano Johan Napbolatgipa, uni Jisuko napbolatmitingo nikanini gimin janapskaa. Uan, Gisikni ong∙onani aro Uno donganiko mesokani ong∙achim. Isol una Gisik Rongtalgipako maiba toanio ba symbolicallysa mesokaha. Uan, paroa gita ong∙onbae mesokani ong∙achim (Isaia. 11:2; Ezekiel. 36:25-26; Mark1:10; Watata 2:3-ko nidapbo). Mati, Mark aro Lukni seanioba Gisikni ong∙onani aro Uni donganiko janapa; indiba Johanni seaniode, Johan Napbolatgipaba Uko nikaha ine janapa. Uan, Johan Napbolatgipani, Jisuni gimin ma∙kete sakki on∙na man∙aniko, mikrontangchi nike sakki on∙aniko mesokachim. Ua somoio Gisikni ong∙onako janapani gimin, mitam mitam Sastro skigiparang ba pe∙giparangde, Jisuona Uni napbolani somoiosa Gisik Rongtalgipa ong∙onbaa, una skangde ua Isol ong∙ja, mandesan ong∙aia ine aganachim. Namedake sandiode, uan chong∙motgipa Sastro gita skiani ong∙jachim. Mati aro Lukni sea Nama Kattaoniko nigenchimode, Jisuko oko keanian Gisik Rongtalgipaonisa ine nikna man∙gen. Uni napbolmitingo paroa gita Gisikni ong∙onbaanide uan, Johan Napbolatgipana parape∙anisa, ua somoionisa Uona Gisik Rongtalgipa ong∙onbaa ong∙ja.

Pod 34-o, “Anga nikaha, aro uan Isolni depante ine anga sakki on∙aha,” ine agana. Ia agananian Johan Napbolatgipani sakki on∙ani chubatgipa ba climax ine aganna man∙gen. Una skangde ua, Jokatgipa ba Jisuni gimin aganasa agansoengachim. Ua, Uko nikgija ba nikgenchimoba u∙igijasa aganaiengachim. Uko (Jisuko) napbolatani somoio una Isol, Jisuona paroani bimango bilbae parape∙ahaosa, ua Uko Isolni depante ine u∙iaha. Iano Isolni depante ine agananiba Isolna bate chonbatako miksongjachim, indiba uan Isol ba deity ong∙aniko mesokani ong∙achim.

Bebeko Sakki On∙ani aro Manderangni Knachakani (Johan 1:35-42)

Nama Kattako segipa Johan da∙ode Johan Napbolatgipaoni Jisuona re∙angskaengaha ba jaksi ote mesokskaengaha. Iano Johan Napobolatgipani Jisuni gimin sakki on∙anina adita manderangni knachakani ba ra∙chakani aro uni biterangko nikna man∙a. Jensalo Johan Napbolatgipa Jisuni gimin sakki on∙a aro uko mesoke on∙a, unon adita manderang uko ja∙rikna a∙bachengaha. Ua manderangan Jisuko ja∙rikchenggiparang ong∙a. Uamangni gimin ka∙mao gita niangna.

Pod 35-36-o, “Pil∙e uni sal sao Johan an∙tang sninggipa sakgnimung chadengengachim; Aro Jisuni roengako nie ua aganaha, Hiawa nibo, Isolni Mess Bi∙sa,” ine agana. Iano uni salsao ingipara banoni chanbae ong∙achim namede aganna man∙ja. Dr. Stanley Tousainni, agana gitade uan, pod 29-o uni salsao ingipaoni salsagipao ine agana. Pod 29-o Jisuni an∙tangona re∙baako nike uko manderangna mesoke on∙aha. Ia on∙sogimin Sastroode Johan, Jisuni roengako nikesa, an∙tang sninggiparangna mesoke ba agane on∙aha. Uarangko niate ua, Jisu ba Jokatgipani gimin aganani ja∙mano Uko changgnina mesoke on∙aha ine chanchiatna man∙a.

Pod 37-39-ode, “Aro ua sninggipa sakgni uni aganako knae, Jisu baksa re∙angpaaha. Unon Jisu an∙pile uamangni re∙bapaako nike, uamangna aganaha, Na∙simang maiko am∙a? Uamang Una inaha, Rabbi (jeko seskaode Skigipa ine inani pal ong∙a), na∙a bano donga?  Ua uamangna aganaha, Re∙babo, unon na∙simang nikgen. Uni gimin uamang re∙bae uni dongramko nikaha, aro unsalo uamang Un baksa dongaha. Chikung kontamang ong∙aha,” ine agana. Johan Napbolatgipa Jisuni roengako nike, uan Isolni mes Bi∙sa ine aganahaon, uni sninggiparangoni sakgni Uona re∙angaha. Uan uamang maiba nambatako ba mingsingbatgipa dilgipako ja∙rikaiani ong∙jachim. Uamangni Johanko wate Jisuona re∙anganian Johanni miksonganiba ong∙achim. Uade Jisuni gimin agangipa ba sakki on∙sogipa ong∙esa uamangko re∙dilsoaiachim. Chong∙motko Johanni sakki on∙ahaon uamang Johanko wate Jisuona re∙angaha.

Jensalo ua sninggipa sakgni Jisuona re∙angaha, unon Ua, uamangko maikoba am∙engama ine sing∙aha. Maini gimin Jisu uamangko maiko am∙enga ine sing∙a namede aganna man∙ja. Haida uan, uamangko porikka ra∙ani mingsa ong∙a ineba chanchiatna man∙a. Mitam mitam sandie nigiparangni agana gitade uamang Jisuko sing∙e ninasa (preliminary question) re∙angaha, uni giminsa Jisuba uamangko maikoba am∙engama ine sing∙skaaha. Jisuni uamangko maikoba am∙engama ine sing∙ahaon, uamang uko Rabbi ine agane ‘bano donga?’ ine sing∙skaaha.

Ua sninggiparang Johan Napbolatgipani sninggiparang ong∙a. Johan Napbolatgipara Jisuni gimin sakki on∙gipa aro Jisukoan Jokatgipa, Isolni Mes Bi∙sa ine uamangna agane on∙aha. Uni gimin Johan Napbolatgipa Jisuni gimin talen u∙ienggen ine chanchiatna man∙a. Ua sani bi∙sa, banoni, badia songoni, gimikkon toktoki-malokki u∙ienggenchim. Uarangni giminba ua uamangna agane on∙enggnokchim. Indakode mainasa uamangara Josukoan bano donga ine sing∙skaenga? hai an∙ching chanchiate nina. Iano donga ingipa adita ning∙tuani ba gisikni bidingo aganani ong∙achim. Uan (donga) name mancha ma∙kape ba intimacy ong∙aniko miksongachim. Uan, gisikni bidingo ning∙tuaniko, Isolni bil ba kamrangko sing∙ani ong∙achim. Uamang Uko sing∙ahaon u∙igen ine chanchiahakon. Uni giminsa uamang Jisuo Uni donganiko sing∙ahakon ine chanchiatna man∙a.

Jisu uamangni sing∙anina uandakgipa biapo donga ine aganchakgija, “Re∙bae nibo” inesa aganchakaha. Uni ortode Uni kamko ba Uni dongani ba intimacyko sing∙mangmangaride u∙ijawa, indiba re∙bae nina ba cha∙tote nikgipa ong∙na nanga ine ong∙achim. An∙chingni janggi tanganioba basakoba maiba gitalko u∙ina skanirang donga. Uarangni gimin sing∙eba nia indiba basakobade re∙ange niarangde dongskaja. Re∙ange nia ingipara an∙tangan bakko ra∙e cha∙tote nikani ong∙achim. Golpo mingsa gita saksa mande namen circus kal∙na changbegipa dongachim. Ua Niagara Falls ba dare-ni kosako budu kae paksaoni paksaona male mesokon manderang una kusi ong∙tokbeaha. Manderang kusi ong∙e jakpa dokengon ua, uamangoni sakoba uni pakkreo gate re∙dilna man∙ama man∙jawa ine sing∙aton, jinmaoni, “Man∙gen, man∙gen,” ine chrikataha. Uni gimin ua uamangko, uamang man∙gen ine ka∙dongode uona re∙angchina okamataha, indiba darangba uona re∙angna ka∙dongjaha. An∙chingni janggi tanganioba basakoba ga∙suani gimin sing∙a, agana aro mittela, indiba nang∙ko angko ga∙suanio bakko ra∙china okamode an∙chingba re∙angna kena. Da∙alo Isolni songnoko ga∙sugipa mingsinggipa ong∙aoniko nang∙ko maiba champengani dongama?

Pod 40-42-ona ia kattarangko agana. Johanni aganako knae Un baksa re∙angpagipa sakgnioni saksa Simon Pitorni jonggipa Andrew ong∙achim. Ua skang an∙tang adatang Simonko man∙e una aganaha, Chinga Messia-ko man∙aha, jeko aganskaode, Kristo ong∙a. Unon ua uko Jisuona rimbaaha. Jisu uko nie aganaha, Na∙a Johanni depante Simon, nang∙ko Kipa minggen, jeko aganskaode Pitor ong∙a.  Ia kosako on∙sogimin kattarangko niaton, Tura mondolini pamong Rev. Dr. Wetterfield-ni agangipa kattarangkoba gisik ra∙atjola. Uni agana gita ua napbolgenchimoba, Jokataniko u∙ie napbolade ong∙jachim: Chichi napbola chiraraan ong∙aiachim. Uni Turaona re∙bae poraipiloba ua Kristoko ra∙chake jokatako man∙a inede u∙ikujachim. Unon uni ripeng sakgni, Greathalson Arengh aro Sengrak maraksa uko Kristoko ra∙chake jokatako man∙a ine u∙iatna krengstapaha. Iani a∙selsa ua ja∙mano B.D. poraie, Tura mondolio pamongni kamko ka∙e, A∙chik A∙songo aski rongsa gita ching∙e dongaha. Sengrak aro Greathalson Arengh dongjaode uni janggi tangani maian ong∙genchim, uni giminde aganna man∙ja.

Johanni Nama Kattako semitingo Simon Pitorkoba namen mingsingaha. Uko Ibri ku∙siko Simon ine minga aro uan uamangni atchu gitcham Jakobni depanteni biming Simeonni bimingchi mingaha. Ua atchu gitcham Simeon gitan namen bimchipgipa ong∙aha. Jisu uko Pitor ine Greek ku∙sikchi mingkalake okamaha aro uni ortoara ro∙ong ong∙achim. Aramaek ku∙sikchi uko Kipa ba Kepas ine okama aro uni ortoba ro∙ongan ong∙achim. Beben a∙bachengo uoba jajaanirang, kenanirang, chakchikna man∙gijanirang, gaora dakanirangba donga, indiba Jisuni siani ja∙manode ua saksa ka∙donggipa aro Kristoni a∙bao dukko chake janggitangko on∙chakpile gamgipa ong∙aha. Johanni Nama Kattako semitingoba uni nama kamko ka∙anina, skiprakanina, ka∙donganina mingsing-minggamaha, indiba jonggipa Andrew dongjaode uaba maidakgipa mandean ong∙genchim agannade man∙ja. Andrewsa unaba Kristo Jisuan Jokatgipa ong∙a aro uamang Uko man∙aha ine una aganaha. Ian Andrewni dal∙begipa kamko ka∙aniko mesokani ong∙achim.

Ia somoio an∙chingba Andrew gita sakoba sakoba Kristoona rimbana nanggiparangan ong∙enga. Beben an∙chingoni sakantide pamong, procharok ba missionary ka∙janaba donga, indiba an∙ching sakoba rimbana man∙ode ua manderangoni mitamde mingsinggipa skiprakgipa, mingsinggipa pamong ba missionary ong∙gen. Unigimin nang∙ni janggi tanganio saksamangmang ripengko rimbana maiba nang∙ko sringpenga-ritingpenganirang dongama?

Bebeko Ra∙chakgiparangni Sakki (Johan 1:43-51)

Ianoba uni sal sao ingipachi a∙bachengtaiaa. Uan, Johan Napbolatgipa Jisuni gimin gnigipa changna manderangna, mongsongbate uni sninggiparangna aganani sal sagipao ong∙a ine F.F.Bruce agana. Gnigipa changna Johan Napbolatgipani uni sninggiparangna aganani ja∙mano Jisu Galiliona re∙angaha. Uan Uni skanggipa jinmana dangdikani ba public ministryko dakani ong∙achim. Una skang Uko Pitor aro uni jonggipa Andrew ja∙rikangaha. Galiliona re∙ango Ua Philipko man∙aha ba okamaha. Philipara Johan Napbolatgipani sninggipa ong∙ama ong∙ja, ukode janapa dongja, indiba uan Pitor aro Andrewni songjinma Bethsaidaoni ong∙a ine agana (v.44). D.A. Cursonni agana gitade Pitor aro Andrewba Kapernaumona jitangna skangde Bethsaidaon dongachim (Mark. 1:21; 29).  Ua Pitor aro Andrewmangni apsan song ba gittimo dongani gimin, uamang baksa re∙bae, Johanni skiprakanirangkoba gisepde knaenggen ine chanchiatna man∙a. Philipni orto  Greek kattao gure salna namnikgipa ine ong∙genchimoba, ua Pitormang baksaan rorongani gimin, na∙tok rim∙naba namnikenggen ine chanchiatna man∙a. Haida uani giminsa ua Galiliona re∙angahakon ineba an∙ching chanchiatkuna man∙a. Ua Johanni aganmitingo uko ja∙rikangjaoba, Jisu an∙tangan uko okamaha. Johanni sea Nama Katta Odhaisao Jisuko ja∙rikgiparangko janapaniode uan gittamgipa ong∙gen.

Johan sninggiparangko tarion, an∙tangko chasongna ja∙rike roaichina aganaigija, Jisu ba Jokatgipakon ja∙rikchina aganaha (vv.35-38). Uni sninggiparang aro Philipba, Jisuko ja∙rikahaon ba Jokatgipa ine u∙iahaon, an∙tangtango ra∙chipe dongaijaha. Uamang sakgipinnaba aganaha aro uamangkoba Uko ja∙rikchina okamaha. Jisuni sninggiparangoni ga∙sugipa mande Pitornaba Andrewsa agane on∙aha. Iano Philipba Jisuko u∙iahaon, sakgipin uni ripeng Nathanielna agane on∙aha. Nathanielni gipin bimingara Bartholomeo ong∙a ine mitam mitam sandie nigiparangde agana (Mati 10:2; Mark 3:18; Luk 6:14).

Nathanielni aganchakanirangko knae uara saksa skia man∙gipaan ong∙a ine chanchiatna man∙a. Dr. Thomas L. Canstableni agana gitade uara Galilini Kana minggipa biaponi ong∙achim (Johan 21: 2). Ua biapode mingsinggipa, ma∙ambini gimin u∙igiparang, brigiparang dotdalgiparang ku∙ko jegiparang rangko dokgiparang, agrango ga∙kite ikgilgiparang sa∙attalo pakpake gisikgiparang, bilsi dokrogiparang an∙gil ritchagiparangba bang∙en dongachim. J.C.Bernard aro D.A. Cursonni agana gitade, Uano Jihudirangni ma∙ambiko u∙igipa aro ki∙tap serakgipa Flavius Josephus minggipaba dongachim. Unigimin ua songtang-noktangna gaora daksrokaniba dongakon ine chanchiatna man∙a. Uni giminsa ua, Nazareth gita chongipa, maming mingsing-minggamgijagipa songoni mamingba ong∙katna kraja ine jeakon ine chanchiatna man∙a (v.46).

Philip Nathanielna maikobade aganna man∙genchim, indiba ua mamingkoba aganchakgija, re∙ange nichina aganaha. Haida ua un baksa Sastroko mesokeba jera ra∙nade man∙gen, indiba Nathaniel gita skia man∙gipa, Sastroni gimin poraie chanchirakgipana aganode uan amainaba donga ine chanchiahakon. Una aganoba ua uni chanchia gitasa agane, ukon ampilaigen ine chanchiahakon. Uni giminsa ua re∙ange an∙atangan nie nichina ba experience ong∙china ine aganahakon.

Iano Philipni agangipa katta, an∙ching Kristoni gimin sakgipinna agane on∙nagiparangna bang∙bea skidapaniko on∙ani gnang. Philip gita, Sastroko poraigipa, chanchirakgipa, ba ong∙jaoba, gipin gipin ki∙tap ba toromni ki∙taprangko poraie chanchirakgipa manderangna Kristoni gimin aganode, uamangba uamangni u∙igimino pangchake aganchakgenchim. Uamang baksa jera ra∙grikoba mitamrangkode amnaba donga, indiba mitamragkode amchongmotjawa. Jera ra∙e amjaode an∙ching uamangko Kristoni gimin u∙iatna man∙jawa. Mitamrangko jera ra∙e amnaba donga, indiba amani gimin uamang nang∙ni angni aganako bebera∙gen, Kristoko u∙igen ba ra∙chakaigende ong∙aijawa. Basakoba an∙ching jera ra∙e ameba, uamang baksa nangrimanikosa chel∙atskaa. Unode uamangko Kristoona rimbaani pal ja∙gitotanikosa on∙skagen. Uko u∙iean, Philipde Nathaniel baksa jera ra∙gija, re∙ange nichinasa aganahakon. Unigimin an∙chingba, sanaba Kristoni gimin aganengon, Jera ra∙ani pal, uamang re∙bae an∙tangtangan cha∙tote nichina mesoke on∙ode namjawachimma?

Jisu, Nathanielni Uona re∙angako niksoe uko Israel mande chong∙mot, jeon tol∙napa gri, jong∙sik-chalwenga ba peo wajong cha∙a gri oko jo∙ong napa gri  to∙om-rinok nambea ingipa gita aganaha. Uan skanggipa Israel ba Jakob gita ong∙ja ine aganani miksongani ong∙achim. Jakoban Israel jatoni skanggipa ong∙genchimoba uo tol∙anirang dongachim (Abachenga. 27:35-36; 28:12; cf. Johan 1:51). Ua kattarangko Jisuni aganoba ua Uko chone ra∙kuaengachim. Uni giminsa ua Uko maikai u∙ia ine sing∙ahakon (v.48).

Jisuko ja∙rikgiparangoni beben jajagiparang bang∙en dongnaba donga, indiba Sastroo mesokanio sakgni manderang donga. Uni skanggipa public ministryko dakmitingo saksa uan Nathaniel aro bon∙kamgipa public ministryko dakanio, uni siaoni chakatpilanio saksa aro uan Thomas ong∙a (Johan 21). Nathanielsan ong∙aija, an∙chingni janggi tanganioba basakobade ugitan jajana man∙aia. Uko jokatgipa ine ra∙chakna man∙gijanirangba dongaia. Haida ua, u∙itang-ma∙siatango pangchake, songtang-noktangni mingsing-minggamanio pangchake uko ra∙chakna man∙jaha ba jajaaha ine chanchiatna man∙a. Da∙alo na∙ara, maini a∙sel, Jisuko Jokatgipa ine ra∙hakna, ba ra∙chakgenchimoba chu∙gimik Uo ka∙dongna ba ja∙rikna man∙jaenga? Nang∙ni u∙ianioma? Gam donganioma? Gamna, a∙gilsakni gamrangna ba mainaba rikanioma?

Nathanielni jajaengon, Jisu uni dakrongbewalko aganaha (v.48). Pharisirang dumbur bolni ja∙pango asonge Torahko chanchibewalgipa ong∙achim. Maini gimin uamang dumbur bolni ja∙pango asonge Torah ba Niamko poraia, namede aganna man∙ja; indiba uamang dumbur bol aro drakka bipangkode gisikni bidingo namgnina aganmitapao jakkalrongachim. Uni giminsa haida uamang dumbur bolni ja∙panngo asonge Torahko chanchibewalrongakon ine chanchiatna man∙a. Hindu toromo badiaba bolrang jekai prap ba giting bolrangode maiba dakgipa gisik ba spirit donga ine giting bol ja∙tingrango boli on∙e olakkia. Jihudirango uandake, dumbur ba drakka bipangrango maiba dake Isolni gisik donga ine bebera∙ani dongama dongjama ukode name u∙ija, indiba uan uamangni Torahko poraie chanchibewalna basegimin ong∙achim. Badiaba biaprang ba nikanirangde Isolni kattako chanchibewalatna man∙ja, indiba badiaba biaprangode Isolni gisik dongpaa gita chanchimana ine agangiparangba donga. Haida Israel manderangba dumbur bol sambao asonge poraiode uandakgipa gisikrang dongpaa gita chanchianirang dongakon. Unigimin Nathanielba uko dakrongahakon ine chanchiatnasan man∙aia.

  Jisu, uni dakbewalko agane on∙ahaon ua Uko Rabbi ba Skigipa, Isolni Depante, Israelni Raja ine ku∙rachaka ba aganaha. Uni nikanio uan ong∙ronggijagipa, ramram manderangni aganana ba chanchiana bate u∙igipa ong∙achim. Ua Uko Supernatural ba mandeni u∙i-masiana batgipa ine nikaha. Basakoba basakoba manderang sakoba sakoba Isolni Depante ine okamgiparang dongachim. Uan, uamangoba Isolni gun ba dakbewal gita dakgiparang dongani giminsa uamangko Isolni depante ine okamachim. Uandakgipa Isol ba mitdeni gunrangko nikani giminsa A∙chikrangba Mia Misi ga∙gong Mandeskaan Saljong ine aganachim. Uandakgipa cholon-bewal donggipa gandakon uamang Misiska Saljong ganda ine aganakon. Indiba iano Nathanielni agangipa Isolni Depante ine agananide Jisuo Isolni gun ba dakbewal donganiko agangija, Uni Isol chong∙mot ba fully deity ong∙anikosa miksongachim ine Calvery Churchni Pamong Heitzig agana. A∙bachengo ua jajagenchimoba, uni dakbewalko agane on∙ahaon, Uko Isol ba Isolni Depante ine bebera∙aha.

Nathaniel, uni dakbewalko Jisuni agane on∙ana Uko Isolni Depante ine u∙iahaon, Jisu una minggipin gisik ra∙na nanganiko agandapaha. Uni dumbur bolni ja∙pango dongako  aganna man∙aniba aiao inmananian ong∙a; indiba ua Un baksa donge Uko ja∙rikgenchimode, una bate dal∙arangko nikangrorogen. An∙chingni janggi tanganioba basakobade Isolni aiao inmangipa kamrangko nikna man∙a, indiba an∙ching Un baksa dongode, Un baksa somoiko ra∙ode an∙ching Isolni dal∙a kamrangko nikbatrorogen. Ia aiao inmanani basakobade saa-ding∙ako namatani, basakoba kenbegnioni naljokaniba, basakoba okkrimitingo maiba cha∙a-ringaniko man∙ani ong∙naba donga. Basakoba saa-ding∙arang namgija, kenbegnioni naljokgija, okkrimitingo mamingkoba man∙gijanirangba ong∙naba donga, indiba an∙ching Isolni aiao inmangipa kamrangkode nikna man∙gen. Unigimin nang∙koara, Kristoko ja∙rikna maia champengani donga?

Pod 51-ode Ua, salgini oa aro Isolni Sa∙grerangni Mandeni Depanteni kosakona gakatako aro ong∙onaniko janpaha. Ian, Niam gitcham Sastroo, atchu gitcham Jakobni nikgipa jumangko mesoke aganaha (Aba. 28:10-22; Watat 10:11; Para. 4:1; 19:11). Iano ua ‘Beben’ ingipa kattako jakkala aro uan Greek kattaode amen amen lego humin aro uko Englishode truly truly, ine agangipa ong∙a. Uan, namemancha ma∙siatna ske ba stress ka∙e agangipa ong∙achim. Salgini oani aro jang∙ke gita, Salgiona gadoani aro Salgioni a∙aona ong∙onbaaniara, mande aro Isol baksa nangrimanikon mesokani ba aganani ong∙achim. Mande pap ka∙ani a∙sel, Isol baksa nangrimna man∙jaha, indiba Kristoni a∙sel uko nangrimataha.

Kosako janapgimino, Andrew Pitorko Kristoona rimbaaha aro Philipara Nathanielko rimbaskaaha. Uan, uamang an∙tangtang jokatgipako u∙iani ja∙mano uko ra∙chipe dongaigija, sakgipinna aganani ba sakgipinko Kristoona rimbaani ong∙a ine aganna man∙gen. Ian, uamangni missionna ka∙oksiani ba concern donganiko mesokani ong∙achim. An∙ching sakantiba, uamang gita saksa sakgipinko Kristoona rimbana nangenga. Unigimin na∙ara, Jisuni sninggipa ong∙pae, sakgipinrangko Kristoona rimbana maikobade dake nipagenma? Aganna changgipa ong∙ode agane, skina changgipa ong∙ode skie, tangka ba gamrang bang∙genchimode uarangko missionna on∙e ba una agreba jechin na∙a missiono bakko ra∙na man∙a, uarangko dake nina nang∙ko maiba champengani dongama.?

Philip Nathanielko Jisuona rimbaanio altugipa ong∙ja, indiba ua un baksa jera ra∙gija uko re∙ange nichinasa aganskaaha. An∙chingni Kristoko ja∙rikanio, Uni missiono bakko ra∙anioba altugipade ong∙ja.  Uko champenganiarang bang∙en dongnaba donga. Ua champengani basakobade songtangoni, mondolioni aro basakobade noktangoni, basakoba na∙a an∙tangoniba ong∙naba donga. Iandakgipa neng∙nikniko man∙on na∙ara maiko dakgen? Philipde Nathaniel baksa jera ra∙ede namgniko man∙jawa ine Jisuona re∙ange nichinasa aganaha. Jisuona re∙ange nina Nathanielnade neng∙ani ong∙jachim. Ua an∙tangan Jihudi ong∙e, jokatgipako nichaksogipa ong∙achim. Una skang Johan 1:19-28-ona, Jihudirang Johan Napbolatgipaona mande watatanikoba an∙ching nikaha. Uan, uamangba Johanoba uamangni nichaksogipani adita gunrang ba chinrangko dakaniko nikani gimin ong∙achim. Uni watatgipa ong∙jaoba watatako man∙gipao haida Nathanielba dongpaengnaba donga ukode aganna man∙ja. Uni giminsa Philip, Nathaniel baksa jera ra∙gija, jeon ua an∙tang Kristoko cha∙tote nike u∙inagipa cholkosa basee on∙skaaha. Isolni missionko ka∙anio, mondoliko rikanio, neng∙nikaniko man∙engon na∙ara dakrongako dakaigija, maiba cholko dakskana maiba champengani dongengama?

Jisuona re∙ange Uko nikoba Nathaniel Uko Messiah ba jokatgipa ine ra∙chakna jajakuengachim. Haida uan uni u∙ianio pangchakani a∙sel ong∙a ine chanchiatna man∙a. Da∙alo an∙chingba Jisuni gimin aganako knagenchimoba, Jisuan Jokatgipa ong∙a ine jajagiparangba dongkuaia. Iandake jajagiparangoni na∙aba ong∙paama, an∙tangko sing∙e nioara? Nathanielni jajaengon Jisu una uni dakrongbewalko agane on∙ahaon ua Uko Israelni Raja, Isolni Depante ine u∙iaha. Apsan daken na∙aba Jisuni gimin jajaengode Isolni kattaona re∙angbo. Unon ua nang∙na agane on∙gen. A∙bachengon na∙a aditako cha∙totgen, indiba Un baksa dongjringode na∙a bang∙batakon chagronggen. Unigimin na∙ara Jisuona re∙bana maiba jajaani dongengama? Mainaba ka∙pakengama?

…………………………………………………………….