Sunday, 15 November 2020

AM·BOL JA·BAK GATGIPA MERONG RONGDIK DONGIPA--2

 

1.2   Bebegipa ba Faithful Onga·nina  Kadonga (Toe Skia.31:11)

            Bang·bata sandie nigiparangni nikani gita, ua Gun Gnanggipa Me·chiko maming ong·siani ba dimelani dongjachim. Stephen A Ratliff-ni aganani gitade ua Gun Gnanggipa Me·chik ba jikgipaara Isolni on·anisa ong·achim. Uan, Toe Skiani odhai 7-o janapgipa til·ek-an·charakgipa me·chikmingde namen dingtangbea. Ua Sastroo mesokani gita segipani bachiba re·angmitingo ua me·chikara sakgipin panteko un baksa turimchina aganaha. Una agreba an·ching Josephni golpokoba poraigenchimode Potipharni jikgipani Josephko un baksa turimchina agananiko nikna man·gen.  Uandakgipa jikgiparango segiparang ka·dongna man·jachim. Toe Skiani 31-o janapgipa me·chikde uandakgipa cholon ong·siaoni namen dingtangachim. Uni giminsa uni segipa jechi re·angoba uo ka·dongna man·achim.

            Bilsi dokroe an·gil ritchae tanganina batede, gun gnange ba cholon-bewalo nitoe janggi tanganian nambata ine aganani kakketan ong·a. Courtney Josephni sandie nikani gita uandakgipa me·chik ba jikgipao segiparang bang·aon ka·dongna man·achim. Uarangoni mitamrangko ka·mao mesokatenga.

 i  Bebegipa Ong·e Tangka-Paisako Jakkala

Basakobade, ua me∙chikni segipa, chel·a biapchi re·ango una bang·a tangkarangko donangenggen, ong·jaoba basakobara Money Order ka·atenggen ine an∙ching chanchiatna man∙a. Segiparangni dongjao badiaba me·chikrangde uamangni jako man·gipa tangkarangko jana name isape koros ka·na changjachim; indiba ua Gun Gnanggipa Me·chikde uandakgipa tangka-paisarangko name isape koros ka·na changachim. Una agreba basakobade segipa nokona sokbaningna man·ja aro tangka paisarangko watatnaba man·ningjachim. Uandakgipa somoirangko chagrongon badiaba me·chikrangde segipakosa basakon sokbagen, maian dakchaenga, noko dongsogiparangde maiko cha·gen-ringgen uarangni gimin simsaksrangja ine segipako ka·onangchipe-bika sochipe dongrongachim. Ua Gun Gnanggipa Me·chikde uandakgipa somoirangko chagrongomangba an·tangan je cholko dakenba  tangka-paisa man·na jotton ka·a aro nokdangni nanganirangna simsaksoachim. Uarangko nike uni segipaara an·tang sokbaningna man·jaoba aro tangka-paisarangko watatningna man·jaoba nokni manderang maiko cha·gen-ringgen ine jajrengna nanggija jikgipaon ka·dongachim.

 

  ii   Bi·sa-Desarangko Tarianio Ka·donga

Biap gipin a·dam dingtangchina segipani re·angengon noko dongsoenggipa dedrangko nirok-simsaksona altubeade ong·jachim. Un baksanaba cholon namgijagipa me·chikrangde dedrangna Isolni kattako skie on·na, lekka-porako skie on·na maming simsakani dongjachim. Ua gun gnanggipa me·chik dedrangko Isolni kattao dal·atna skie on·ronga, lekka-porako skie on·a, cha·a-ringanina, ganna-chinanina simsaka aro noksul-songsulming maikai janggi tangna nanga uarangkoba skie on·achim. Jihudi ma∙a-paarang dedrangko dal∙ahaoba Isoloni re∙ekjachina skie on∙ronga. Uni giminsa uamang, nokni mikkango,  jekai krongo, do∙gacholo, badiaba niknangra dakgipa nokni bako, Isolni kattarangko tape donronga aro ka∙tongoba uarangko ganata. Uamang cha∙engon, ringengon, rama re∙engon aro tuna a∙bachengmitingo Isolni kattako dedrangna agane on∙rongachim (Deute. 6). Badiaba badiaba jatrangode, bed time story ba tusimitingo agangipa golpoba dongachim. Jihudi manderangnade, Isolni kattako dedrangna agane on∙anian bed time story ong∙a ine nikatna man·a. Ian, Isol Jihovana kenchina dedrangko skiani ong∙achim. Janapgimin Gun Gnanggipa me∙chikba, dedrangna Isolni kattako, cha∙engon, ringengon, tuengon aro rama re∙engon agane on∙enggen. Un baksanaba ua, nokni krong, do∙gachol ba niknangrarango Isolni kattako tape donenggenchim ine chanchiatna man∙a. Iarangni a∙sel pagipa an∙tang dedrangko name nina man∙jaoba, jikgipao ka∙dongna man∙aha. Ka∙sara ma∙giparang ba pagiparang, an∙chingni dedrangko Isolni kattao dal∙atna altugipa ong∙jachongmot. Indake ong∙genchimoba, basakobade nokni pagipa badiaba biaprangchi, a∙gilsakni dingtang dingtang kamrangna ong∙katna nanga. Basakobara ma∙gipa dingtang dingtang kamna ong∙katna nangskaa. Indakgipa obostao nang∙ni segipa nang∙o ba nang∙ni jikgipa nang∙o ka∙dongna man∙genma? Ma, “Anga dongjaode angni dedrangde mai ong∙gen?” ine jajrenggenma?

 

iii Bebe Ong·e Nokdangko Nirok-Simsaka

Badiaba kattarangde, katta-bichong apchongenchimoba, uni miksonganirangde namen apalbea. Nokdang ine aganoba uan namen apalgipa orto ba miksongani dongachim. Skangni somoio aro ia somoioba bang·bata biap ba jatrangni dakbewalon me·asa ba segipakosa nokdangni skotong ine chanachim. Palestine joloba skango aro da·oba me·asa ba segipakosa nokdangni skotong ine chana. Uni gimin nokdangni pilak nanganirangna aro nokdangko chalaianina segipasa pilakkon niroke kamko ka·rongachim. Indake ong·engon basakoba segipa a·song gipinchi ba chel·kala biapchi badingna ba maiba nanga kamrangna re·ango noko dongsoenggipa jikgipa nokdangko nirok-simsaksona changrongjachim. Ua somoio da·o gita agangrikani cholrangba dongkujachim. Uandakgipa a·selrangko chagrongoba, ua Gun Gnanggipa Me·chikde maming pa∙sikani grian an·tangan pilak nokdangni nanganirangna simsaksoa aro bian nokdangko chalaisoachim. Iarangko nike uni segipa chel·achi re·ange sokbaningna man·jaoba nokdangni nanganirangna jikgipao ka·dongna man·achim.

 

iv Belbelrakani ba Mitakani Gri

 Bi·samitingo, Levison Marakni ring·ani mingsa, “Me·chikmarang tom·dake, setangtangko mitake,” ingipako gisep gisepde knamanpaa. Una agreba anga song damsao mande saksani buringchi kam ka·mitingo salgimik nachil nasangana songona sokbapilahaon jikgipa uko mitakani giminsa uni nachil salgimikan nasangaha ba gam·aha ine jikgipako ka·onange dokanikoba knamanaha. Beben an·ching ua me·apani chanchia aro Levison Marakni ring·ani baksa sko gakupana man·jaoba badiaba me·chikmarangde segipa dongjao setangtangko agan-mitake rogiparangba dongna nanga ine chanchichipatnade man·a. Apsan daken Israel ba Palestine joloba segipa dongjao segipako agan-mitake rogipa me·chikrangba dongachim. Segipako ba jikgipako skatang agan-mitakania basakobade nokdangrangko so∙so jengjeng ong∙ata. Haida basakoba saoba chanchinaba donga, “Mitakania chongipa kamsan,” indiba gisik ra∙bo ripengrang, Wal∙misiba dal∙begipa a∙brikon kamatna ama ine aganani donga aro uan ong∙bebea. Chipu Nokmako manderang bisi dongja ine agana, indiba Chipu Nokma Suode Ka∙sinsinsa Pari Ong∙a ine, Bluwin Ch. Sangmaba GRIKJADIL magazine-o janapa. Mitakanikoba na∙a dal∙e nikjanaba donga, indiba mitakani a∙selan badiaba badiaba nokdangrangde, kuajina mindinina dongpilgija nokrurong jamruronganirangba donga ine sandie nigiparang agana. Gipin me·chikrang, segipatangtangni kosako agan-mitake rooba, ua Gun Gnanggipa Me·chikde segipako agan-mitakani dongjachim. Uni gimin uni segipara uni jikgipa uko maming saloba agan-mitakjawa ine uo ka·dongna man·achim. Uan Jakobni chittio janapgimin gita sretangko lagam patna man∙gipa me∙chik ine chanchiatna man∙gen. Sreko an∙ching lagam patna man∙ode, uan namgni ong∙a, indiba sreko jakkalna changjaode uan mandeko so∙otna ba gimaatnaba ama. Uni gimin nang∙ko nang∙ni segipa, “Angkode maming saloba mitakjawa,” ba nang∙ni jikgipa nang∙oba, “Angni segipade maming saloba mitakjawa” ine ka∙dongna man∙genma? Ma “Angni dongjamitingo sakgipinrangna maikon maikon aganjojoe roenggnok!” ine ingenma?

v Bamanichi Segipana Kakket Ong∙a

Bebe ba kakket ong·ani ine aganengon ua me·chikni segipana bamani, una dangdik-sachie on·ani aro segipa songgipinchi re·ango sakgipin me·asa baksa namgijako dakgijanikoba miksonga. Da∙alo, ma∙gipa sakantio, ba pagipa sakantioba ia kakket ong∙anian dongna nangenga, indiba bang∙batan kakket ong∙na man∙rongja. Kakket ong∙jani a∙selan, an∙chingni nokdangrang, dedrang, jat, mondoli aro songsarba silna man∙ja. Na∙a atchiaonin Isolna ka∙sroke on∙na man∙aiode, na∙a mandesal ba normal ong∙ja ine Rev. Alpha Sengbani, Mendalo Soba ong∙o skianiko anga knamana.  Uko ja∙rikpae, “Na∙a atchiaonin kakket ong∙ode na∙a mandesal ba normal ong∙ja,” ine angaba agangen. Kakket ong∙nade Isolni bilchisa man∙gen. Uni gimin na∙a kakket ong∙na sikode, na∙a Isolo bi∙gipa ong∙na nanggen.

 vi Bebeo An·tangko Rakkia

Baditana kakket ong·gen mitam mitam sandie nigiparangni nikani gitade me·chikrang gisikni bidingo (emotionally) chakchikna man·rongja. Mongsongbate uamang neng·skime kamko ka·o, basakoba maiba duknirangko chagrongon sakgipinrangkoba ka·onangrongachim. Mitamranga uamangni jaantio bewal ong∙anirangoba, adita gisikni bidingo nom∙anirang ong∙a; unode sakoba sakoba skatang aganmananirangba dongaia ine agana. Ia sandiani ong∙a ong∙ode ba ong∙jaomangba, uandakgipa obostako me∙chik sakantian chagronggen ine nikatna man∙a. Ua sandie niani ba aganni kakket ong∙ode, uandakmiting somoio, me∙chikrangna an∙tangko gisikni bidingo bilake rakkina, simsake aganna altugipa kamde ong∙ja ine nikatna man∙gen. Indake ong·engon ua me·chikni ka·onanganichi, “Amikkani jikgipa” ine segipana namgija bimingko ra·bagenchim. Uandakgipa a·selrangko chagrongoba, ua Gun Gnanggipa me·chikara neng·skime kamko ka·oba aro maiba duknirangko chagrongoba an·tangko ka·sinate rakkie sakgipinrangkoba mande ra·na ba ka·sne aganna changbeachim. Uandakgipa obostako chagronggenchimoba, uara maikai sakgipinoni dingtangna man∙a? maikai an∙tangko ka∙snate dongna man∙a? Uan aiao inmanani ong∙a. Isolni gisik dongjaode, uandakgipa chanchianiko chanchina man∙jawachim ine nikatna man∙gen. Saoba saoba sandie nigiparangni agana gita, mandeni chu∙soka aro chu∙sokgijania, obostako chagrongao pangchakja, indiba maikai obostako chagronga, unosa pangchaka ine agana. Mande, ia a∙gilsako janggi tangenga dipet, dingtang dingtang a∙sel-apot ong∙anirangkode chagrongaigen. Uarangko chagrongon, beben an∙ching uarangko amna altuani ong∙jawa. Uarangko amna an∙ching Isolo bi∙na nanggen. Uarangko niate, ua Gun Gnanggipa Me∙chika, Isolo bi∙rakgipa ong∙a, uni giminsa ua, sakgipin me∙chikrang gita apsan a∙sel-apotrangko chagronggenchimoba, uko chee an∙tangko rakkina man∙aha ine aganna man∙gen.

vii Basena Changanio Kadonga

 Baseaniara mandeni janggi tanganio nangchongmotgipa ine agangenchimoba maming gualani dongjawa gita nika. Mandeni janggi tanganio bang·a changrangon basena nanganirang sokbaronga. Basakobade ua basena nanganiranga rang·gitik basena nanganirangba ong·achim. Uandake rang·gitik basena nanganirangko chagrongon bang·bata me·chikrang ba jikgiparangan basena changrongjachim. Gun Gnanggipa Me·chikde jedakgipa obostako chagronggenchimoba basena changani gimin segipaara uo ka·dongna man·achim.

            Bibalni nitoa gita, ua me·chikni gunara, baditanan segipana katchaaniko on·enggenchim. Ua kosako janapgiminna agreba uo dingtang dingtang gunrang dongkuenggenchim. Uarangko nike uni segipaara ua jeo dongoba aro je a·selrang ong·oba jiktango ka·dongna man·achim. Ua Gun Gnanggipa Me·chiko segipani ka·dongna man·a gita nang·ni segipani nang·o ka·dongna man·aniko, na·aba nikna sikgenma? Jikgiparangsan ong·aigija segiparangba na·simangni jikgiparangni na·simango ka·dongna man·aniko nikna sikama? Ia sing·anide an·ching sakantinan. Gisik ra·bo ua me·chik uandakgipa gunko bini Isol baksa re·ruraanichisa man·aha. Apsan daken an·chingba uandakagipa gunrangko man·na Isol baksa re·ruragipa ong·na nanggen. Jikgipa segipao aro segipa jikgipao ka·dongna man·osa nokdangba tom·tomna man·a, dedrangba name janggi tangna man·a.......(Chu·gimikko ki·tapo man·gen)

No comments:

Post a Comment