Ang'keba Ja'korade Sronge Re'na Man'a

ANG∙KEBA JA∙KORADE SRONGE RE∙NA MAN∙A

Bluwin Ch. Sangma

(Pastor, Teksragre Baptist Church)

………………………………………………………………………….

Ang∙ke bi∙sani gitchinge malako ma∙gipa nike, “Dede na∙ara mainasa gitchinge mala? Sronge re∙boda,” ine ma∙gipani sing∙an baksa aganon, “De a∙ai indakode na∙an sronge male skie nicheng,” ine ang∙ke bi∙sani ma∙gipana aganchakon, ang∙ke ma∙gipaba sronge malna man∙jaha ine aganani donga. Uko ra∙en, A∙chik Aganbewalao ba Aganme∙apao, “Ang∙kede maming saloba sronge malna man∙ja” ine agana. Uan, dedrang namako dakna sikbeoba, ma∙a-paan nambajaode namna man∙ja ine aganani ong∙achim. Minggipin dake niatode uan, dedrang dal∙gipa-chugipa ba chu∙sokgipa ong∙na sikomangba, ma∙a-paan skia-pora man∙gipa ba man∙e cha∙gipa rike donggipa ong∙jaode, chu∙sokna neng∙a ine aganani ong∙achim. Uandake agananiko an∙chingba ong∙ja ine jenade man∙bebeja. Ma∙a-paa  ba songni-nokni manderang maidake janggi tanga, dedrangba ukon ja∙rikade ja∙rikbebeaia. Indiba mingsako nie nibo ripengrang. Sronge re∙na man∙gijagipa ang∙kekomangba, paksamsani ja∙ako ake galode ba ja∙samsa koraode sronge re∙na man∙aia. Ang∙ke, uni ja∙a samsa koraode baditan saknaako man∙enggenchim; indiba uko dakjaode ua sronge re∙na man∙skaja. Uni suk ong∙e dongako gimaatesa ua malna man∙a.

 Bang∙bata chu∙sokgipa manderangni jnggi tanganiko niatengon, uamangkode maming dukni, maming champengani ba maming jajrengani donggija gita nikata; indiba uamangba bang∙a neng∙nikaniko, ramao sringpenga-ritingpenganirangko chagrongesa mande ong∙angaha ba chu∙sokangaha. Ang∙keni sronge re∙na ja∙a samsako gimaatna nanga gita, uamangba badiaba kusinirangko, dakronganirangko, katchaanirangko (comfort zone-ko) gimaatchengaha. Uni ja∙manosa uamangba chu∙sokgipa ong∙angaha. Uandakgipa manderangoni sakgnini janggi tanganiko an∙ching ka∙mao gita niangna.

            Chonmitingo do∙chokna dola, kiro sko bolgrona sol∙a ine agangipa gita, Bollywood Actor, Amitabh Bachchannaba ong∙aha. Ua saksa film kal∙na changgipa aro da∙ode Indiao man∙e cha∙batgiparangoni saksa ong∙aha. Uni janggi tangani gimin knaode, ukode mamingba neng∙nikani dongja gita nika, indiba uaba bang∙a neng∙nikanirangko chagrongaha. Uarangoniko an∙ching aditako niange nina.

Dal∙gipa mande ong∙ani gimin, ukode pilakkon changjola ba man∙jolaia gita nika, indiba uan ong∙jachim. Bollywood filmo kal∙na skang ua All India Radio-o kam ka∙na am∙aha, indiba uni ku∙rang rongma rongma dakani gimin uko ra∙chakjaha. Uni Mumbaiona re∙angchengon mamingkoba u∙ijae, adita walrangnade Marine Drive-ni rama samo re∙brange dongaiaha. Ua bachina re∙angenga aro re∙gen, ukoba u∙ijaha. 1969 bilsioni 1973 bilsiona ua rake kamko ka∙e, ming 12 filmo kal∙aha, indiba uko mingsingjaha. Mingsingjaode, nigiparang aro bregiparangba dongjawachim. Bregiparang dongjaode, tangkaba bang∙e man∙jawachim. 1983 bilsio ua film kal∙e neng∙ani gimin gitilna am∙pilaha. Uni a∙sel ua, be∙en ang∙sengbrejaha aro ua film kal∙anikon dontongna chanchipilaha. Aditani ja∙mano uamang Khuda Gawah ingipa filmko kal∙taion, ua Best Actor ine National Award-ko man∙aha; indiba ua, ua somoimitingo tangka-paisana namen neng∙nikaniko chagrongaha. 1990 jolo ua, ABCL baksa film tarina jotton ka∙aha aro tangkarangko ra∙sroe, groan gapchipaiaha. Uni a∙sel ua, Yas Choprao kam mingsako on∙china mol∙molaha aro ua uko Mohabbatein ingipa filmo kal∙ataha. 1984 bilsio ua film kal∙ako chutti ra∙e, politics-o napaha, indiba ua uno suk ong∙jae, bilsi gittamni ja∙manon wate galaha. Da∙alo uko, film kal∙na changanina, aganna changanina, a∙gilsak gimikchinan mingsing-minggamaha. Ua, Indiao saksa man∙e cha∙batgipa ong∙aha. Ua, uarangona sokna bang∙a dakgrikaniko dakgrikna nangaha aro uarangko watgalgija jotton ka∙ani a∙selsa unona sokdoaha.

Elbikako matchani, gangchipako do∙rengni, jilruru-jilpakpagiparangsa janggi tanganio chu∙sokgipa ong∙ronga ine bang∙a manderangni janggi tanganion mesoka. China a∙songni Jack Ma minggipani golpoko na∙a knaaha, indiba uani gimin aditako niatna. Ua China a∙songo, Communist dolrangni sasonni ning∙o, kangalbegipa nokdangosa atchiaha aro dal∙roroaha. Poraianioba ua, paksa siwaleesa, tong∙sa tangmandalesa. kambe do∙tekmeesa, mikkang pedaweesa poraiaha. College-o napna entrance seanioba ua, changgnina kingkingde fail ong∙aha ba chu∙sokjaha. Gittamgipa bilsiode ua rakbate poraie, college-o napna man∙aha. Ua, 1988 bilsio graduate ong∙aha. 

Gisik-ka∙tong dingchiken ua, Harvard University-o napnaba changchikkingna jotton ka∙aha aro changchikkingnan jegalako man∙aha. Graduate ong∙ani ja∙mano, dingtang dingtang kamrango kam ka∙na jotton ka∙aha aro chang 30-na jegalako man∙aha. KFC-oba ua kam ka∙na jotton ka∙aha, indiba unoba jegalako man∙aha. 1999 bilsio ua Alibaba, ecommerce business-ko bikoataha. Uni ua business-ko chalaina a∙bachengon, China a∙songni badinggarang, uamangni business-de bon∙aignok ine jegale sorkarina sedoaha. Uandakgipa neng∙nikanirangko chagrongon, mande ong∙e ua baditan sa∙dikani aro kratcha∙aniko man∙enggenchim, indiba ua uarangchi amna on∙jaha. Uni miksonganiko ua dontongjaha. Ua, uni companyni gimin, manderangna talataha, u∙igipa-ma∙sigiparangna aganaha aro dol ba teamko tariaha. Da∙ode ua China a∙songo man∙e cha∙batgipa ong∙aha. Uni China a∙songo man∙e cha∙batgipa ong∙ania, obostako chagrongani a∙sel ong∙jaha, indiba obostako chagrongna tariani (name deal ka∙ani) giminsa ong∙aha. Da∙alo nang∙ko chu∙sokanioniko maia champengenga?

Ha gose! chu∙sokgipa manderangni janggi tanganiko niatode alturiri nikata, indiba uamangba bang∙a dakgrikanirangko dakgrikesa rangkambeona soktokaha. An∙ching sakantini dilanio, kam ka∙anio, aro miksonganioba, namgipa, chu∙sokgipa, bebegipa ong∙anikon nangenga. Indiba uanona sokdonara cholrang dongpaja. Haida nang∙ni ma∙a-paaba dilgipa ba namgipa dilgipa ong∙paja. Haida na∙a namgipa skulo poraina man∙paja. Haida nang∙na namgipa ku∙pattigipa dongja. Haida nang∙ni songan-nokan skia-pora man∙gipa ong∙paja. Iarangan, nang∙ni name janggi tanganiko, namgipa, grikgipa dilgipa ong∙aniko, miksonganiko champenganima? Beben uarangba nang∙ko champenggiparang ong∙chongmota. Kosako janapgimin, Amitabh aro Jack Ma maangba uandakgipa neng∙nikaniko chagrongaha, indiba uamang obostachi amna on∙gija, uamangsa obostako amna jotton ka∙aha. Uamang ang∙keni sronge re∙na, ja∙a samsako gimaata gita, badiaba badiaba kusinirangko gimaate, rake kamko ka∙e, dangga birongni sona gantongni nokgipa ong∙aha. Na∙aba, obostako chagrongengon, uarangko ga∙chepna, badiaba kusinirangko watgale, kni ‘tip’ chimsate gando ‘ket’ salkete, kok samba siora, atte pakkol sepora mai ong∙genchim?