CHIPU NOKMA SUODE KA·SINESA PARI ONG·A

CHIPU NOKMA SUODE KA·SINESA PARI ONG·A

Bluwin Ch. Sangma

“Nokmana Bisi Tikja,” ine Aganme·apao agananikode na·a knaaha ine anga chanchia. Iani golpoko kan·dike agangenchimode uan, skango dakgipa-rugipa patti-ra·rongipa, Bisi Bimako a·ni prem chini jim·jem gimiknan sual-ra·ronatna ine okamtokaha. Unomiting, chipu nokma mikelongmade, “Angara nokmara nokmasa, angnara donsoaigen,” ine re·angningjaha. Ja·mano ka·sine re·angoara binade bisian tikjaha aro uni a·selsa chipu nokmaode, da·alona kingkingba bisi dongja ine agana. Iandake agananio beben namgipa skidapanirangba donga, indiba an·ching dilgiparang ong·ode, ukoba dingtang mikronchi (perspective) niatna nanggen. Chipu nokmaode bisi dongjana, uni gimin uni suode mamingba ong·jawa ine suna on·ode aro suoba samra-sampilgija donode dal·bea gimaani ong·gen. Haida na·a bebera·janaba donga, indiba anga chingni song sambao chipu nokma sua man·gipa mande saksako nikaha. Ua mande, uko chipu nokma suoba, ‘mamingba ong·jawa, chipu nokmaode bisi dongjana’ ine namrenge ra·aiaha. Beben uni chanchia gita, unomiting una mamingba ong·jaha. Uni gimin ua an·tangko mamingba ong·ja ine gipinrang gitan kusi ong·e janggi tangaha. Bilsisamang badeaha, uko chipu sugipa ja·ao pari ong·baaha. Unosa ua una samra-sampilna a·bachengaha. Unomangba uni pari batroroaha, bon·chotaode ua mande a·gilsakkon wate re·angsrangaha. Tangrikgipa manderangsa wak-matchu doke, cha·rikskaaha.

            Minggipin, chipu suani gimin aganengon, anga angni jongsariko chipu suanikoba gisik ra·atjola. Ua, uko chipu sumitingo an·tangko chipu suenga inen u·ijachim. Ja·mano maiba na·tik kepa gita on·tisa dimjret dake sa·dikana nioara, chonbegipa chipusa male katangengachim ine agana. Ua, uko chikgipa ba sugipaara, ua male katanggipa chongipa chipuan ong·na nanga ine chanchie dongrikaiaha ine agana. Uaba uko sugipa chipu ong·genchimoba, uan chonengani gimin mamingba ong·jawa inesa chanchiachim. Uni gimin ua uko darangnaba agangija gilja nokon dongpaaha aro gilja ka·anio guiter dokaha. Gilja jokani ja·manosa ka·sinsin uni ja·aba ripombaaha. Unosa ua an·tangko chipu sua ine gipinrangna aganaha. Beben uko samra-sampile namatna man·aha, indiba ru·uta salni ja·manosa namaha. Iarangko niate, chipude chipu pilakan chipu, chipu dal·gipa, chipu chongipa, chipu nokma pilakon bisi donga ine aganna man·gen.

            Kosako janapgimin chipu nokma aro chipu chongipaomangba bisi donga gita aro uarangni suo mandeo bisi napa gita, an·chingni janggi tanganio, mondoliko aro songsalko dilanioba, dingtang dingtang bisirang donga. Ua bisi ba dakmajoanirang an·chingona dingtang dingtang obostarang gita sokbaa. Badiaba kamrangkode an·ching altuaen namja ine u·ia. Churinga, chupeka, mande so·ota, sakgipinni jik ba seming til·eka, uarangkode an·ching mongsongbate dilgiparang namja ba pap ine chana. Uni gimin uandakgipa kamrangkode bang·bata dilgiparangan dakbrokpaja. Uarangko dakbrokode, an·chingko sakgipinrang nikgen aro unode an·chingko darangba ja·rikjawa ine chanchia aro uan ong·aba ong·a. Badiaba kamrang, jerangkon gipinrang nikja aro chonbegipa gualanirangkode an·ching namrenge ra·skaa aro mamingba ong·jawa ine chanchia. Indiba gisik ra·bo ripengrang, chipude chipu pilakoan bisi donga aro bisi napahaode, uan pari ong·gen ba siaonaba sokgen. Beben badiaba chongipa kamrangko na·a namrenge ba chone ra·naba donga, indiba uan changsao nang·ko gimaaniona sokatgen. Badiaba kamrangko an·ching sakgipinna parakgija ka·na man·naba donga, indiba uan, nang·ni ministryko dakanio, dilgipa ong·anio sabisiko on·gen.

Mandeo sabisi dongode jekoba name ka·na man·ja. Skangni rajarang, uamangna dangdike on·giparangko mikkang rongchinganiko, an·seng-baljoke donganiko nangnika. Uni giminsa Danielmangko, Babylonian Civil Service-na seokon, uamangna nambatgipa cha·aniko on·aha (Daniel 1). Niam gitchamni somoio Isolba, Una nambatgipa on·anirangko on·anikosa nangnikachim, indiba Israelrang, Malakini somoio nambatgijagipa on·anikosa, ja·a koragiparangko, mikron kana ba mikleng dakgiparangko, sabisi donggiparangkosa ra·baaha aro iana Isol suk ong·jaha (Malaki. 1:8-10). An·chingni dangdike on·ani ba dilanioba, maiba gualani ba namgija kamrang donggenchimode, uan ja·kora aro miklengrangko on·gipa gita ong·gen.

Chongipa gualani ba dakmajoanirang an·chingona salantian ong·nasipile sokbaa. Ia chonbegipa gualani ba dakmajoanirangoni mingsakode chagrongenggen ine anga chanchiata.  Haida na·a sorkario dal·kala kamko ka·ode, saoba saoba maiba kamrangna re·bagiparang, an·tangko mikkang niatchina, jakmarang-ja·marangna gogat-chanchoke, sepake-siksepe donanggiparangba dongenggen. Uarangko na·a bi·ara bi·ja, uamangsa on·angani gimin mamingba gualani dongja gitan nikaigen. Minggipin ia sal somoirang, na·ara saksa skia man·gipa ong·aha ine chanchibo. Skia man·gipa ong·e kamrangko sandie nipaoba, test aro interveiwrangko name dakatoba kamkode man·jaenga aro gitchiade korok nangpilengjok ine chanchibo. Unon na·a, sakgipin jemangan nang·na bate name dakna man·jachim, uamangsa kamko man·angaha ine chanchiatskabo. Unon, uamangoni saoba saobarangde, maikoba dakanichisa man·aha ine na·a nikatgen. Iandakgipa obostarang ong·ode, nang·onaba, sorkario dal·gipa kamrangko ka·gipa manderangna tangka du·e, kamko man·na skani gisik sokbagen. Darangan uko dakesa man·enga ine nike, haida nang·onaba sakgipinrang gita dakpana sikani gisik sokbanaba donga. Minggipin, an·chingni ia somoio dakmajoanirangko chagronggipara, sakgipinrangni nikna man·gijagipa, jekon na·asan nikna man·achim, uarangba ong·a. Jekai, internet aro technology-o agre somoiko gimaatani aro namgijagipa noksarangko nianirangba ong·a. Beben uarangko darangba nikja, indiba nang·ni Isol baksa nangrimanide chel·rorognok. Na·a Isol baksa nangrimanioni chel·ahaode, nang·ko dilgipa ong·aoniko tang·onatgnok.

 Kosako agangiminrang chongipa gualanisan ong·naba donga, indiba na·a uarangna chol oe on·ode, uarang nang·ona napgen. Ua sabisirang nang·ona napahaode, uan nang·ko ong·siroroatgen. Niam Gitchamo Isol, angna agre nang·ni gipin Isolrang dongjachina ine agana (Reongkata.20:3). Ua somoio, Israelrangko, Isol Jihovako olakkiaoniko ba Un baksa nangrimaoniko chel·atgiparangoni mingsaara gipin isolrangko olakkianian ong·achim. Uni giminsa ua, gipin isolrangko olakkiaoniko nangnikja. Ia somoio nang·koara maia, Isol baksa nangrimaoniko chel·atenga. Uan chongipa ba dal·gipa gualani ong·naba donga, indiba uarang nang·o napahaode, uan nang·ko ong·siatgen. Uni giminsa an·ching Isolni manderangde, pilak dakmajoanirangoni katna, gelna aro chelchakaniko man·na nanga.