ESTHER RANI

 

ESTHER RANI

Skangni somoio aro ia sal somoirangoba nitogipa aro mingsinggipa aro gun gnanggipa me·chikrang bang·en donga. Uandakgipa me·chikrangoni Estherba saksa ong·a. Estherni nitoani, gun gnangani aro Isolna kenani aro jat a·songna ka·saani gimin aditako ka·mao niangna

Biming

Esther ingipa biming, bini biming manchade ong·jachim. Uan, uni bimang daknangana, Persiani manderangni on·gipa bimingsa ong·achim. Uan Persia ku·siko Satara ba Star baa ski ba nitogipa bibal[1] aro Babylonian ku·siko Ishtar ingipa mitde me·chikni bimingsa ong·achim. Uni biming mancha ba Ibri bimingde Hadassah inesa ong·chim.[2]

Ma·a-Paa

            Esther saksa ma·gri-pagrigipa bi·sa ong·achim. Uni chonrngon, uni ma·a-paa siahani gimin, uko, uni wanggipa Mordekaisa aldu-mittange dal·ataha. Ua, wanggipa Mordekaichin, nama bewalo aro Jihudi toromni namgipa bewalo dal·atako man·aha.[3]

Uko Rani Songa

            Israel ba Jihudirang bang·a changon gipin jat ba a·songrangchi rim·gittangako man·ronga. Persia a·song ba songnok, Darius rajani siani ja·mano, uni depante sason ka·rikaha. Uni bimingko Persia ku·sikode Khshayarsha minga, aro uko Ibri ku·siko Ahasueras aro Greechi segipa Bible-o Xerxes minga ina.[4]  486-465 B.C.E (Before Common Erra) bilsimango, Ahasueras-ni Persiao sason ka·mitingoba, Israel ba Jihudirang Persiani rajani ning·o dongengachim. Uamangko, Babylonni raja, Nebukadnezarni somoion rim·gittangbaaha ina.  Ua somoio, Ahasueras rajani songnok, Ethiopiaoni Indiaona sokpile a·song ba songnok dam ritchasa kolgrik sni dongachim ina. Uko New Bible Commentary-o, Pakistan sepang, Indus chibimaoni, Nile chibamani rikam Sudanona sokpila ine janapa.[5] Ua chonchongipa a·song ba songnokrango, uni sason ka·giparangko donachim. Ua chonchongipa songnok ba a·songrangoni Sushan-ba damsa ong·achim. Esther rim·gitangako man·gipa Ibri me·chikba Sushanon dongachim.[6]

            Esther nitogipa me·tra ong·achim ine Esther Odhai sao janapa. Ua somoio, raja, silsilgipa me·chik ong·jaoba raniniko, maiba alaniona ba tom·dakataniona okamate, be·en-bimang silatangko jinmana mesokate kusi ong·atrongchim. Maini gimin silgipa me·tra ba raniko jinmaona re·bae mesokata, angade name ma·sijaha. Haida ua, ua rajaode silgipa rani donga ine manderangni mittelako man·na sikanio ong·akon inesan angade chanchichipatengjok. Ua, Vashti ranikoba uni alaniona re·bae, uni silgipa bimangko jinmana mesokechina okamataha; indiba Vashti rani uanona re·angjaha.[7]

Jensalo Vashti rani, rajani namnika dakjahaon, uni pal nitogipa me·trarangoni sandiaha ina. Ua somoiara Tebeth ja ba chikkingipa ja ong·ani gimin sinkari ong·achim ina. Sinkari ong·ani gimin haida bang·bata me·trarangni mikkang ba an·gilrangan ran·e, nidikenggenchim.[8] Sinkari ong·oba, Esther-ni nitoni dimeljachim Ua somoio, gipin gipin me·trarangna bate, Esthera-an bimang nitobatgipa, silbatgipa aro gun gnangbatgipa me·tra ong·ani gimin, ukon Vasti ranini pal, rani donaha ina.[9]

Wanggipa Mordekai aro Israel jatrangko jokata

            Esther, silgipa me·chiksan ong·aija, ua ka·donggipa me·chikba ong·achim. Jensalo uni wanggipa aro Jihudirangko nisina ge·etaniko on·ahaon, ua ka·dongbee aro gisik seng·e, raja baksa agangrikaha. Ua, ua somoio, ong·ronggijagipa bewalo rajana mikkang pa·aha. Ua somoio rajana ong·ronggija bimango mikkang pa·na namen kenbegni ong·achim. Jisuni agangipa, nama nirikgipade, mesrangni gimin janggitangko on·chaka ina gita, ua, an·tang janggina mamingkoba simsakgija, jattang mandetangna ka·sae ba uamangko jokatna ske, rajako ka·dongbee mikkang pa·aha ba alaniona rajako okamataha. Uni ka·dongbee aro gisik seng·e dakanichi, Isrealrang nisiataoni naljokaha aro uamangko mikbue kam ka·gipa so·otako man·aha.[10]

            Kosako janapgiminko niate, Esther saksa nitogipa, gun gnanggipa, cholon-bewal namgipa, jattang- mandetangna ka·sagipa aro ka·donggipa me·chik ong·a ine nikatna man·a. Ua nitoa aro cholon-bewal namani giminsa gipin me·trarang baksa susaanio chegipa ong·e, ranina seokako man·aha. Ia ia sal somoirango competitive exam gitan ba una bateba rakengnaba dongachim. Ua, uko, maming tangka du·a grian passed ka·aha. Ua jattangna ka·saani aro kakket ong·ani ba ka·dongani giminsa jattang mandetangko, nisie gimagnioniko jokataha. Ia sal somoirango, Esther gita nitogipa, ka·donggipa, cholon-bewal namgipa aro jattang-a·songtangna ka·sagipa me·chik ba me·saarangko nangenga.

---

[1] D.A.Caeson, R.T. France, J.A Motyer, G.J Wenham, eds, New Bible Commentary; 21^ST C entury Edition (India:Authentic Books, 2023 ,)446.

[2] Charles F.Pfeir, Howard F.Vos,John Rea, eds, Wycliff Bible Dictionary (Hendrickson Publication), 548.

[3] Charles F.Pfeir, Howard F.Vos,John Rea, eds, Wycliff Bible Dictionary …548.

[4] D.A.Caeson, R.T. France, J.A Motyer, G.J Wenham, eds, New Bible Commentary….446.

[5] D.A.Caeson, R.T. France, J.A Motyer, G.J Wenham, eds, New Bible Commentary……..446.

[6] Charles F.Pfeir, Howard F.Vos,John Rea, eds, Wycliff Bible Dictionary (Hendrickson Publication), 548.

[7] Charles F.Pfeir, Howard F.Vos,John Rea, eds, Wycliff Bible Dictionary…548.

[8] D.A.Caeson, R.T. France, J.A Motyer, G.J Wenham, eds, New Bible Commentary……..446.

[9] D.A.Caeson, R.T. France, J.A Motyer, G.J Wenham, eds, New Bible Commentary……..446.

[10] D.A.Caeson, R.T. France, J.A Motyer, G.J Wenham, eds, New Bible Commentary……..446.

 

AADHAAR CAARDKO KRISTIANRANGNA RA∙NA KRAAMA

 

AADHAAR CAARDKO KRISTIANRANGNA RA∙NA KRAAMA

Aadhaar Card-ko tariani gimin dingtang dingtang manderangan dingtang dingtang dake agana. Mitam mitam manderang iakode bebera∙giparangde ra∙na man∙ja, maina uade 666 number jean satan-ni numbersa ine agana. Mitamranga, iakode bebera∙bo ra∙jabo sakantian ra∙na nangaia ine aganskaa. Uko 666 number, jean satan-ni number ine agangiparangoni, mitamrangde, gilja re∙gijagipa, chu pekgiparangba aganaia. Uko ra∙oba mamingba ong∙ja, ine agangiparangoni mitamrangde, mondoliko dilgiparang, pamongrang aro ga∙sue aganprakgiparang, jemangan international speaker-rangmangba aganaia aro bang∙bata pamongrang ba skiprakgiparangan ra∙tokaba ra∙tokaha. Mondolini dilgiparang aro pamongrangoniba, uko jegale agangiparangba, uade an∙ching bebera∙giparangni kam ong∙ja, uan 666 number-an ine agangiparangba dongade dongskaaia. Iarang ong∙engon, saniba aganana uko dakpaaio, aro saniba aganana una kenaioba ong∙ade ong∙taija. Iani gimin an∙ching Sastroo aro dingtang dingtang manderang agana, uarangkoba niate nina.

An∙chingni India a∙songko skangode, dingtang dingtang a∙songrang sason ka∙a aro bon∙chotede, British manderang sason ka∙a. Britishrangni somoioba, raja ba ranirangchisa sason ka∙ani gimin uko monarchy ine agana. India, 1945 bilsini August 15 tarikosa jakgitel ong∙aha aro ua somoioni India an∙tang biltang jaktangchi sason ka∙aha. India jakgitel ong∙aonin, Indiao sasonni bidingo Democracy,  manderangni seokako man∙gipaan sorkari, manderangchin sorkari aro manderangna sorkari ingipako ra∙gata. Ia Democracy ong∙ahaode, uan an∙tangtangan raja ong∙na krengani gimin, uan anti Christ ba 666 number ong∙gen ine kentokbeaha ine agangiparangba donga. Jensalo, Sadam Husain Americani kosako chakata, unon Sadam Husainan a∙gilsak gimiko sason ka∙gen aro uan Anti-Christ, uni number-an  666 number ine agangiparangba donga. Mitam mitam manderanga, Nero rajasa, Christianrangko mitchigipa ong∙ani gimin uasa Antichrist, uni numberan 666 number ine aganskaa. Saoba saobarangara, Catholicrangni Pope-an Anti Christ, uni number-an 666 number ine agangiparangba donga. Mitam mitam manderanga Bin Ladenan Anti Christ aro uni numberan 666 number ine aganskaa.  Saoba saobarangara, Barak Obamasa Anti Christ, uni gimin bini numbersa 666 number ine aganskaa. Mitamranga, International Fund For Agricultural Development (IFAD) Anti Christ, uni numbersa 666 number ong∙a ine agana. Mitamrangara, 666 numberde Russia, mitamrang China, mitamrang, International Monetary Fund, mitamranga World Wide Web, mitamranga, Internationa Network (Internet) aro unadaken. Da∙o an∙chingni a∙songo Adhar Card-ko tarina nangani gimin aro uno microchips dongani gimin, mikronko aro jaksi ja∙sirangko photo ka∙ani gimin ian matburing ba satanni number, 666 number ine kentokenga. Iana kengiparangoni, mongsongbate, an∙chingni A∙chik Kristianrang ong∙bata. Ua Card-ko 2002 bilsimangon a∙bachengataha, aro Assam aro Meghlayana agre, Christian, Muslim, Hindu gimikan ra∙tokaha. Indakode iara 666 manchaanma, ma ong∙jama? An∙ching Kristian bebera∙giparangni pangchakanide, Sastroan ong∙a, aro nambatgipa aganchakaniba Sastroan ong∙a. Uni gimin an∙ching Sastrokon badale nina nanggen, uan an∙chingni Janera ong∙a.

            Sastroo 666 numberni gimin Parapea 13:1, 13:17-18; 16:2; 19: 20-o agana aro uko matburingni number ine agana. Ua Parapea Sastroo agangipa 666 numberde ia Adhar Card minggipan ong∙na nanga ine da∙alo bang∙an jajae dongenga.  Ua Adhar Cardan Parapea Sastroo, 666 number-ko janapgipa ong∙ama ong∙ja, uani gimin u∙inaode, an∙ching Parapea Sastroni gimin, uko mai somoio, sawa sana ba maidakgipa manderangna, maidakgipa obostao  seaha uko u∙ichengna nanngen.

            Parapea Sastroni gimin komibeoba dolbri Schoolni manderang dingtang dingtang dake agana. Skanggipa, Idealeast Intepretation. Ia dolni manderangni aganani ba skianiode, Parapeao segipade, nikna man∙gipa ba bimang chongchong ong∙gipa ba ong∙enggipa ba ong∙nasiako seja, indiba gisiko dakgrikani ba namgijako namachi amani giminsa ong∙a ine uamang agana. Iano Anti Christ ba 666 number ingipaba mande man∙cha ong∙ja, indiba namgijagipa kamko toe agananisan ine uamang agana ba skia. Indiba uamangoni bang∙batan Liberal theologianrang, jemangan mitamrangde Sastroko Isolni katta gita ra∙gijagiparangba donga.

            Gnigipa dol ba schoolara, preterist interpretation, jeni ortoan Latin ku∙siko, “Preater” ingipaoni ong∙baa aro uni ortoara Past ba Batanggimin ine ong∙a. Ua dolni manderang, Parapeao matburing ba Anti Christ-ko janapgiparangde batanggiminkosa seani gimin, uno segiparangde maming saloba ong∙piljawa ine agana. Indiba ian Parapea 1:19-o, “Iarangni ja∙mano ong∙nasienganirangko,” ine agangipamingde melija.

            Gittamgipa dol ba school ba pe∙e agangiparanga, Historicist interpretation. Uamang, Johanni somoiona agreba dingtang dingtang somoirangoba, ua Anti Christara sason ka∙aha ine agana. Uamang, Anti Christ-de bijangchi jologipa Catholic Pope-rangan ong∙a ine agana. Indiba, ua dolrangba, badia Pope-mancha, uko mesoknade man∙taija. Ua dolonian, dingtang dingtang pe∙e agangiparangan dingtang ong∙grikaiani gimin, uamangni pe∙anikoba, ian chong∙mot ine agannade man∙taija.

            Brigipa dol ba school ba pe∙e agangiparanga, Futurist school of interpretation ong∙a. Ua dolni manderangni aganani gitade, Parapeao janapgipa Anti Christ-de batanggimino ong∙ja, indiba mikkangchisa ong∙gen. Uamangni chanchia gita Parapea Sastroora bon∙kamgipa salrangni giminsa seaha.

Koasako janapgiminrangoniko niate, uan batanggiminni giminba seaha, indiba uko mikkangchide ong∙jawa inede an∙ching aganna man∙jawa. Ua, mikkangchide ong∙jawaha ong∙ode, uan Isolni kattaba ong∙skajawa.

            Ia Parapea Sastroko semiting somoio, Kristianrangna namen namjabegipa obosta ong∙engachim.  Ua somoio, Romanni raja ba Kaisar, pilakan Kaisarna agre darang gipin mitde ba Isol ba isolrangko olakkina man∙jawa ine niamko dakaha. Ua somoio, Kaisarko olakkigiparangara cholon ong∙sigipa, jean Kristoni sikanionide bikpilgipa ong∙achim. Jensalo dragon (chipu, satan Parapea. 13: 2-4), matburingna Kristianrang baksa dakgrikna bil on∙ahaon (Parapea.), bang∙bata manderangan ukosan olakkiaha.

            Ua matburingara, Romni rajarang, jean 64 A.D-oni 113 A.D-mangona Kristianrangko namen a∙rikbeani ong∙aha.  64 A.D bilsimango, Rom songjinmako wa∙al kamon, Nero raja an∙tangko manderangni matnanganiko naljokatna, Kristianrangni kosako dosiko galaha. Iani ja∙mano, dikdiksana Kristianrang tom∙tom dongna man∙aha. Indiba 81-96 A.D bilsimango, Domitian raja Kristianrangko a∙riktaiaha. Uamang Kaisar-ko olakkigijagipakode, anti-government, ba anti-natioal, ba anti social chong∙motan, sorkarini kosako bobil dake chakatgipa, a∙songni kosako chakatgipa, ba songsalo meli-nangrimgijagipa ine chanaha. Haida uan, AFSPA-na bateba namen namjabegipa ong∙aha. 113 bilsio, Constantine raja, Kristianrangko jegita a∙riko, so∙otoba bon∙atna man∙jani aro uamangni bilakrorobaaniko nike, a∙rikaniko dontongaha aro an∙tangba Kristian ong∙aha. Ua an∙tangba Kristian ong∙e, Kristian toromko legal religion, ba pilaknin ra∙chakna man∙gipa torom ine parakaha aro unonin Rom a∙songba Kristian ong∙aha.

            Sastroo  number 3 (gittam)-ko namsranggipa ba chu∙soksranggipana jakkala (Pagipa Isol, Depante Jisu Kristo aro Gisik Rongtalgipa) Revelation 1:4,11-13,16,20; 5:1,6).  Number  (dok) 6-ara, namsranggijagipa, matchotsranggijagipa ba chu∙soksranggijagipa, jean sniona (7) sokmangijagipa ong∙a. Uni gimin  666 ba dok ge∙gittamara, namgijani, ba chu∙sokgijani, ba matchotgijanian bon∙joljok, mingsaba chu∙sokani, ba matchotani, ba namani dongja inani pal ong∙a. Ua somoio, Roman songnokni raja, una batgipa darangba dongja, uan salgisak-a∙gilsako dal∙batgipa ong∙a, uni gimin unasan kenna, bamna aro ukosan olakkina nanga ine niamko dakaha. Jemangan rajako olakija, aro uamang baksa namgijako dakja, uamangkode rakbegipa sastiko on∙ani hokum dongachim. Ua somoio, Kristianrang, raja ba Kaisarko olakkina jechakaha aro uamang baksa namgijako dapana jechakaha. Uni a∙sel Kristianrangko dal∙begipa satiko on∙aha. Indiba ua Romni Raja aro uni dal∙begipa songnok, jekon ua chu∙soksranggipa ine bebera∙achim, manderangba chu∙soksranggipa ine bebera∙achim, uan, Johanni somoimitngo, Isolni katta gita niatode chu∙soksranggijagipa chu∙soksranggijagipa ong∙achim. Iarangko niate, bang∙a Isolni matgrikrangan ia sal somoiorangode, jean Kristo gri janggi tanga, aro uko ja∙rika, uan chu∙soksranggijagipa 666 ong∙a ine agana. Sastroo an∙chingna, “Pilakan papa ka∙aha aro Isolni rasongko man∙sokja,” ine agana (Rom. 3:23). Mitam mitam skigiparangni sandie niani gitade, ua Isolni rasongko man∙sokgijanian ba pap ka∙anian 666 number ong∙a. Isolni rasongara chu∙soksranggipa ong∙a aro uko number 7-o dona. Indiba Isolni rasongko man∙sokgijagipa ba sokmangijagipaara, 7-na komigipa 6 ong∙a. Uni gimin, chu∙gimikan ba pilakan pap ka∙ode, uan chu∙gimikan chu∙sokgijagipa ba 666 ong∙a ine uamang agana. Uarangko na∙a anga bebera∙bo, ra∙jabo, indiba an∙ching maming saloba, mandeni namanichi, mandeni rasongchi, jotton ka∙anichi, namachi, ba kamchi Isolni rasongko man∙jawa, indiba Isolni ka∙sachakanichisa. Isolni ka∙saanisa chu∙soksranggpa ong∙a.

Uarangko niate, Adhar Card-ko tarigiparangde, Isol gri ong∙engjok inede an∙ching aganna man∙aijawa.  Micro-chipsko ra∙giparangde Isol ri ong∙engjok ineba an∙ching aganna man∙aijawa. Ia sal somoiorango, saoba micro chips gri janggi tangna man∙genma? An∙chingni jakkatenggipa mobile networkrangon ba SIM-rangon, ATM Card-rangon aro tangkaomangmangba chips donga. Uni gimin darangba chips-ko jakkalgijade ong∙na man∙jawa. Minggipin, Sastroniko niatode, an∙chingara, Isolni Ka∙sachakanichisa (by Grace of God) aro ua ka∙saanio bebera∙achisa jokatako man∙aha ine agana. Darangba gaora de∙jachina, ua kamoni ong∙ja ine agana (Ephesus. 2: 8-9). Adhar Card-ko ra∙gijagiparangsan, micro-chipsko jakkalgijagiparang, tangka jakkalgijagiparangsan jokataniko man∙ode, ua Ephesus 2: 8-9- “Ka∙sao bebera∙achi na∙simangko jokataha….ua kamoni ong∙ja,” ine agangipade tol∙gipa ong∙gnok. Ua kattan tol∙gipa ong∙ode, uan Isolni Kattaba ong∙jawaha. Uni gimin, Adhar Card-ko ra∙eba, Kristo gri janggi tangoed, uan chu∙soksranggijagipa ong∙gen, Adhar Card-ko ra∙jaeba, Kristo gri ong∙ode chu∙soksranggijagipaan ong∙a. Uni gimin pilakna skangba Uni songnok aro toromko am∙chengbo.

KRISTIANARA VACCINE SUMALAMA

 

KRISTIANARA VACCINE SUMALAMA

                                    Bluwin Ch. Sangma

Songadamni song damsao balwa ta∙rakbegipa balbaon, saksa mandeni  nokko man∙angna man∙angna dakaha. Ua mande, chasongnaba Isolo bi∙a dongkuja, indiba ua somoiode ua indine Isolo bi∙na a∙bachengaha, “Aiao….angkomangmangde donpakubo, angni-jikko-dekoan jeba dakangbo. Aiao…, angkomangmangde donpakubo, angni jikko dekoan jeba dakangbo.”  2019 bilsio Chinani Wohan songjinmao atchigipa Corona Virusni, a∙ni a∙bigilo chini chibilo donggipa premko chimjemko cha∙skal-cha∙kamalangon aro uko sanna banna maming chol dongjaengon, a∙gilsak jadachangaha. A∙gilsakni bang∙a biapon rama den∙pengjok, do∙ga ketchangjok. School, College, Universityrangkoba chipaha. Olakkiram biaprangko chipaha, bazaar-anti cha∙anirang dongjaha, bading-chiwalgiparang, ge∙e-game cha∙gipa darangan palna-botna neng∙nikbeaha. Uandakmiting somoio, bang∙a bebera∙gipaan Isolo bi∙tokaha aro mitamrangde chasongnaba Isolo bi∙e nikgijamangba ua somoiode bi∙enggnok ine anga chanchiate nibeenga.  Sigipa bon∙gipa, sagipani gimin aganna man∙piljaha, indiba bilsisamangni ja∙mano, uako champengsona Vaccineko su∙naba man∙aha. Vaccineko su∙na man∙ahaode, scientistrang, medical expertrang, doctorrang aro a∙songko sason ka∙giparangba sko saani namkalgnok ine chanchienggenchim, indiba ong∙nade man∙srangjaenga. Uko su∙giparang bang∙genchimoba, uko su∙na beng∙giparang, jajagiparang aro kengiparangba bang∙ean dongkuaenga. Uko su∙na kengiparang aro su∙kugijagiparang, an∙chingni A∙chik a∙songosan ong∙aigija, a∙gilsakni dingtang dingtang biaprangon dongkua. Ian an∙ching sakantini chanchina nanggipaan aro ukode diksil dal∙kalao ritna nanggipaan ong∙a. Uan, ritchenge ra∙na nanggipade ong∙ja.

A∙gilsakni dingtang dingtang biaprango, dingtang dingtang toromrang donga.  Ia pilak toromni manderangan an∙tangtangni olakkigipako nambate nika aro darang toromba an∙tangni ja∙rikgipa toromni dakbewalko ong∙siatna, gimaatna ba maiba namgijako dake, Isol ba mitdeni doke skiani ba bichalko man∙na sikja. Uandake olakkiani ba bebera∙ani bewalko ong∙siatnagipa ba gimaatnagipara, Corona Virusni Vaccineba ong∙a ine, bang∙a toromni bebera∙gipa aro mitamrangde skigipa ba dilgiparangba agana.

Indiao bang∙batgipa ba jelbatgipa manderangde, Hindu toromko ja∙rikgipa ba bebera∙giparangan ong∙a. Uamang an∙tangtangko rongtale janggi tangna ska aro skangonin, Sudra ba chongipa jat ba gipin toromni manderangming cha∙brin-ringbrine marang nangatjana chanchigiparang ong∙a. Apsan daken ia Corona Virus Vaccineara Hindu toromko rongtalgija ong∙atna ba marang nangatna (defile) a∙gilsakni dingtang dingtang manderangni chanchiaonisa ine saksa Hindu toromni dilgipa agana

Greek orthodoxni Bishop saksa, Covid Vaccine-de ong∙gijagipa wantiko bringipasa ong∙ani gimin, ukode su∙na ba ra∙na nangjawa ine agana. Wanti ian, skiani, ba bebera∙aniko miksonga. Jisuba,   Herodni wantina mikrakna nangani gimin agana aro uan Herodni ba uni dolni ong∙gija skiani ba chanchianina mikrakna nangani giminsa agana. Israelni saksa skigipa ba Rabbi ia Corona Virusni Vaccineara, manderangko gay ong∙atgen, unigimin uko Israel manderangde su∙na nangjawa ine skiskaa. Zambiani saksa Evangelist aro Politician, Dr. Nevers Sekwillia Mumba, Zambiao darangba vaccine su∙na nangjawa ine aganaha. Badiaba badiaba Kristian dolrang, mitamde Americani aro dingtang dingtang a∙songni Kristianrang, Covid Vaccinede Sastroo agangipa 666 numbersa ong∙ani gimin ukode su∙na kraja ine agana ba skia. Sastroo, be∙en gisik aro janggini ong∙sigija dongna nangani gimin agana. Covid Vaccinde an∙chingni be∙enko ong∙siata (defiled) unigimin  uko ra∙na ba su∙na nangja ine mitam mitam Kristian dolrang skiskaa.  Mitamranga, vaccineode microchips dongani gimin uko su∙na nangja, mitamranga uan Isolo bebera∙gijagiparangni kamsa, bebera∙giparangde vaccine su∙gija, nokgipaon pangchakna nanga ine agana ba skiskaa.

            “I am not a scientist, you are not a scientist,” ine Assemblyo jera ra∙mitingo an∙chingni Ministerrangoni saksa aganaha. Apsan daken an∙chingba pilakande scientist, medical expert, virologist ba medical doctorde ong∙tokja. Unigimin chinga Grikjadil Team gitaba, doctorrang, scientistrang, medical expertrang aro virologistrangni agana gitade aganna ba niatna nangnikjaenga. Indiba bebera∙gipa ong∙e, bebera∙giparangni dakgni ba daitokosa niatna nangnikenga. Bebera∙gipa gita niatengon, manderangni jajaanirango pangchake an∙ching minggniko niate nina. Skanggipa jajaani ba sing∙aniara, Vaccineara sam ong∙ani gimin, Kristian ong∙e, samko jakkalna, ringna ba biji su∙na kraama kraja ingipa aro gnigipao, Vaccineara 666 number ong∙ama ong∙ja, uno pangchake niangna.

Kristianara Sana-Bananiko Nangama

            Samko jakkale sana-bananiara, bebera∙giparangni kam ong∙ja, uan an∙tangtang Isolo ka∙dongna man∙gijaniko mesoka ine mitam mitam Kristian dolrang agana ba skia. Bebera∙giparangde, Isolo bi∙achi Isolo ka∙donganichisa namatna ama ine uamang bebera∙a. Oe, an∙ching bebera∙giparang ong∙e, saaniko namatna Isolo bi∙na nanga, Isoloan ka∙dongna nanga, uan an∙chingni dal∙batgipa oja ba doctor ba scientist ong∙a. Indake ong∙oba, bebera∙giparang a∙gilsakni samkode jakkalnabe, samko jakklode na∙simangni bebera∙ani komia, sam jakkalgipani bi∙anikode knachakjawa ine agananikode an∙ching nikskaja. Una agreba, Sastroo aro Jisuni somoiomangba a∙gilsakni samko jakkalna nanganiko an∙ching nikna man∙a.

            Isolni mande ong∙e, saa namjaode, kangal ong∙ode, neng∙skime janggi tangode, Isolni saoko man∙gipa ine mitamrang chanchia aro mitam skigiparang, mitam dal∙gipa skigiparangba uandake skigiparang donga. Uandake skigiparangoni Benehinba ong∙a. Ua changsao, “Anga manderangko brangataha, manderang Jisuona re∙baode saanirang dongjawa, man∙e cha∙gen ine skiaha. Iandake skina angko ja∙ga nangataha. Anga chisolni giminde skijaha,” ine grappile aganaha. Oe, Kristian ong∙e isigangpakari, salang-walang bangka nangao donge, betbong betbong cha∙anide ong∙jawa. Ua, saoba angko ja∙rikode ua an∙tangko jechina aro an∙tang chisolko ripee un baksa re∙bapachinasa aganani gimin, uano duk chakna nanganiba donga ine nikatna man∙a. Ua, Uko ja∙rikna am∙gipa mande saksana, perurangni a∙kol gnang, do∙orangni bitip gnang, indiba mandeni depanteni skotangko donchakna biap gri ineba agana (Luk 9:57-58). Watata Paulba, Kristo Jisuni nama sipai gita angming duk chakpabo ineba Timothyna aganaha. Ian, bebera∙giparangni janggi tanganio, neng∙nikaniba ja∙rika ine mesokani ong∙achim.

            Watata Paul Kristoni duk chakani, siani aro tangchapilani gimin sakki on∙ano bang∙a dukkon chakaha, chipu sua man∙aha, jahat dubiaha, betsmitchi dokaha, saanirangko man∙aha. Unigimin uaba uoniko bu∙suko ba saaniko ra∙angchina Isolo bi∙aha, indiba Isol una Uni ka∙saani chu∙onga inesa aganchakaha. Timothy saksa Isolni nokkol nokkol pamong ong∙a, indiba uoba ok saani, jean gastric ba chupal saani dongachim. Haida uaba saksa dilgipa ong∙ani giminan samkoba ringjaengachimkon. Indiba, Paul uni bimema jimjemana, chikosan ringaigija, on∙tisa drakka bitchikoba ringna aganaha. Ua somoio, da∙o gita sana-banani cholrang bang∙ede dongkuja, indiba ok saanina drakka bitchikoan jakkalachim. Unigiminsa ua, on∙tisa drakka bitchiko ringchina aganaha aro uan, a∙gilsakni samko jakkalna nanganiko mesokani ong∙achim. Jisuba Uni Namgipa Samariako toe aganon, sanramona ra∙ange sananiko aro sananina dam gamaniko janapa aro uarangba a∙gilsakni samko jakkalna nanganiko mesokani ong∙achim.

            Harding Theological Collegeni Principal gitcham, Dr. Sallindro R. Marak, an∙chingni sana-banani, sanram ba hospitalrangba Healing Ministry ba An∙sengatanina Dangdikanian ine agana. Indiao nambatgipa hospitalrangoni damsa, CMC Vellore Hospitalkoba Kristianrangan chalaienga. Turaoba Christian Hospital, Holy Cross Hospital, Jengjal SDA Hospital aro uandaken dingtang dingtang biaprango dingtang dingtang Kristian dolrangni chalaigipa hospitalrangba Healing ministry-an ine aganna man∙gen. Dingtang dingtang songjinmarango, banoba HIV/AIDS-ko sangiparang, konchi cha∙giparangko sangiparangba healing ministryan ong∙a. Ua konchi cha∙giparangna, HIV/AIDS man∙giparangna, Drugs Addict ong∙giparangna maming sana-bananiko on∙gija, Isolo bi∙mangmangari, na∙simangko Isol an∙sengatchina ine aganmangmangari dongode uan nambeade ong∙jawa. Uarangko Healing Ministry ine chane, Corona Vaccineko Healling Ministry ine chanskagijaniba krabeanide ong∙jawa gita nika.

Corona Virus Vaccineara 666 Numberma

            Corona Virus Vaccineko su∙na kenani mingsaara, uade 666 numbersa ong∙ani gimin Kristianrang ba bebera∙giparangde uko su∙na nangja ine mitam mitam bebera∙gipa aro skigiparang agana. Oe, uandake sing∙anirang aro jajaanirang dongon an∙ching jekoba sapakako cha∙a gita dakskelani, ba aganskelanide ong∙jawa. Bebera∙giparang ong∙e, uandakgipa aganani ba chanchiani ba jajaanirang dongengon, uarangni gimin Sastroo maiko agana, an∙chingde ukosa niskana nanggen. 2020 bilsini December jani issueoba chinga, Aadhaar Card-ara 666 numberma ine sing∙anina aditako talataha. Iani gimin Parapea 13-ko aditan talataniko on∙aha. Parapea 13-o janapgipa 666 numberara mandeni ba matburingni number ine agana. Maini gimin Corona Virus Vaccineko 666 number ine agana, aditako an∙ching niange nina.

            Corona Virusna Vaccine su∙anina kenna skangba, manderang 666 numberni gimin dingtang dingtang dake kenanirang bang∙en dongaha. An∙chingni India a∙songko skangode, dingtang dingtang a∙songrang sason ka∙a aro bon∙chotede, British manderang sason ka∙a. Britishrangni somoioba, raja ba ranirangchisa sason ka∙ani gimin uko monarchy ine agana. India, 1947 bilsini August 15 tarikosa jakgitel ong∙aha aro ua somoioni India an∙tang biltang jaktangchi sason ka∙aha. India jakgitel ong∙aonin, Indiao sasonni bidingo Democracy,  manderangni seokako man∙gipaan sorkari, manderangchin sorkari aro manderangna sorkari ingipako ra∙gataha. Ia Democracy ong∙ahaode, uan an∙tangtangan raja ong∙na krengani gimin, uan anti Christ ba 666 number ong∙gen ine kentokbeaha ine agangiparangba donga. Jensalo, Sadam Hussain Americani kosako chakata, unon Sadam Hussainan a∙gilsak gimiko sason ka∙gen aro uan Anti-Christ, uni number-an  666 number ine agangiparangba donga. Mitam mitam manderanga, Nero rajasa, Kristianrangko mitchigipa ong∙ani gimin uasa Antichrist, uni numberan 666 number ine aganskaa. Saoba saobarangara, Catholicrangni Pope-an Anti Christ, uni number-an 666 number ine agangiparangba donga. Mitam mitam manderanga Bin Ladenan Anti Christ aro uni numberan 666 number ine aganskaa.  Saoba saobarangara, Barak Obamasa Anti Christ, uni gimin bini numbersa 666 number ine aganskaa. Mitamranga, International Fund For Agricultural Development (IFAD) Anti Christ, uni numbersa 666 number ong∙a ine agana. Mitamrangara, 666 numberde Russia, mitamrang China, mitamrang, International Monetary Fund, mitamranga World Wide Web, mitamranga, International Network (Internet), mitamrang Election Identity Card, mitamrang Job Card, mitamrang Aadhaar Card aro uandaken da∙o manderangni gitalbate kengipaara Corona Virus Vaccine ong∙a. An∙chingni India Sorkari aro gipin gipin a∙songrangni dilgiparangan, a∙songni mande sakantikon ua vaccineko su∙china agana ba ge∙eta. Indake ong∙oba uko su∙na kengiparang aro jechakgiparang bang∙ani gimin, haida mitam mitam a∙songni sorkaride, uko su∙gijagipade, bazaar anti cha∙na, office re∙na, school college re∙na man∙jawa, uni gimin a∙songni pilak mandean uko su∙na nanggen ine ge∙etanirangba dongade dongakon. Uko niate uan, Parapeao agangipa matburingni number 666, aro uko ra∙gijagipana agrede darangba palna aro brena man∙jawa ine agangipaming apsan ong∙a ine chanchiesa uko su∙na kena ba beng∙akon.

            Oe, uandake aganani aro ge∙etanirang dongengnaba donga, indiba ua Sastroo janapgipaara maidakgipa aro ia Covid Vaccineko su∙na agangipaara maia, uni dingtanggrika aro apsananikoba name ninade nanga. Parapea 13-o agangipaara, olakkiani aro bebera∙ani gimin agangipa, indiba Covid Vaccineara, maming bebera∙ani ba olakkiani bidingode nangchapja ine bang∙a Isolni manderangan aganskaa. Minggipin, Corona Virus Vaccineko su∙gijagipa pilakande Kristoko bebera∙gipararade ong∙taija aro Vaccine su∙giminrangoni bang∙aan Kristoko bebera∙giparangba donga. Unigimin ramram an∙chingni gisik ba common senseko jakkale sing∙anio, Kristoko ra∙chakgija ba bebera∙gija, Corona Virus Vaccineko su∙gijagipa aro Kristoko bebera∙eba Vaccine su∙gipani gisepo, badiako matburingni number ong∙na krabatgen. Bebe gita Corona Virus Vaccine-an 666 number ong∙ode uko su∙giparangde Kristoko bebera∙oba ra∙jaoba jokjaengjok aro Kristoko ra∙chakbo ba ra∙chakjabo, Corona Virus Vaccine-ko su∙gijagiparangde 666 number-ko ra∙jani gimin jokatako man∙na kraskaa. Sastroode bebera∙gipaan jringjrotni janggiko man∙aha ine agana (Johan 5:24). Vaccine su∙gijagiparangsan jokaniko man∙aiode, Jisuko bebera∙oba ra∙jaoba janggi jokako man∙na kraa, indiba uan, “Bebera∙gipaan jringjrotni janggiko man∙aha,” ingipamingde meliskaja. Ong∙jaode, “Vaccine su∙gijagiparang jringjrotni janggiko man∙aha,” ine aganna man∙genchim. Minggipin jokataniara, ka∙sao bebera∙achisa ong∙a aro uan kamoni ong∙ja ineba agana (Ephesus 2:6--). Vaccine su∙giparara joka man∙gija, vaccine su∙gijagiparangsa joka man∙aiode, ianoba an∙chingni kamchi, ba gelanichisa man∙a ga∙akengjok aro uan, “kamoni ong∙ja” ingipamingde meliskajaengaha. An∙chingni aganani ba skiani ba chanchiani, Sastroo aganaming apsan ong∙ode an∙ching ukosa ja∙rikna aro Sastro gita ong∙jaode uandakgipa skianiko ja∙rikna nambea ong∙jawa.

MAINA KRISTIANRANG ROBIBARO OLAKKIA

 

MAINA KRISTIANRANG ROBIBARO OLAKKIA

                                Bluwin Ch.Sangma

Ia somoio a∙gilsak gimikan ong∙nasipile Kristianrang Robibar salo jinma olakkirima. Indiba uko badiaba badiaba dolrang, Isolni ge∙etgimin Neng∙takani Sal ba Sabbath Ba Sonibar salko pe∙a ine jea.  Ellen G. Whiteni Dal∙begipa Dakgrikani ingipa ki∙tapoba, Sonibaroniko Robibarona dingtangatania 312 A.D bilsio, Constantine rajasa a∙bachengata aro ua salara Salko olakina neng∙takgiparangni salsa ong∙achim ine janapa. Uni ja∙mano Laodikiao, Catholic Pope saksa 320 A.D. bilsio ge∙etanionisa a∙gilsak gimikchian Robibar salo olakkibaskaaha ine agana. Oe, ua aganani gita Israelrang ba Jihudirang Sonibar Salko Neng∙takani Sal ine ra∙a aro 312 A.D. bilsio Constantine Rajaba Robibaro olakibadila aro 320 A.D. bilsio Catholicrangni Pope, Robibar Salo olakkina ge∙etanikoba an∙ching jenade man∙bebejawa. Indiba ua somoionisa Kristianrang Robibar Salo jinma tom∙dake olakkibaaha ine chanchiode ian mondolini itihasko name talaha inede aganna man∙jawa. An∙chingni olakkibaani a∙bachenggipa mondoli ba Kristianrangni olakiaoni dingtangbaode uan gualbeani ong∙gen, indiba a∙bachenggipa Kristian ba Mondoli jekon dakbaaha, uko ja∙rikbaode daksretgipa ine aganna man∙jawa. Namedake sandiode, a∙bachenggipa Mondoli ba Kristianrangni dakrongaoni dingtangbaosa daksretgipa ine aganna man∙gen. Kosako janapgimin gita Kristianrang maina Robibar Salo olakkia ine sing∙ode, iani gimin aditako ka∙mao mesokna man∙gen.

Keith Piperni, Answers, ingipa ki∙tapo, Saturday  ba Sonibar ba Sabbath-ko manianiara Jihudi aro Isol baksa ko∙monggrikani ong∙a, jekon sign of Mosaic Covenant ine talata aro uan Sastro Reongkata 31:13-17-o pangchake aganani ong∙achim. Beben ia kattarangko dingtang dingtang dake pe∙na man∙naba donga. Indiba iani gimin a∙bachenggipa mondolirangni kamrango, aro 300 A.D-na badita bilsi skang, Constantine Rajana badita bilsi skangan Kristianrang Robibar Salo damsan olakkibaa ine bang∙a sakkirangko nikna man∙gen. Minggipin Robibar salo olakkianiara Salni mitdeko olakkiani giminsa Sun ba Sunday ingipa katta ong∙baa ine agananirangkoba knana man∙a. Iani bidingo batanggimin issue-o adita talataha, indiba ukoba mesokattaina nangnikenga. Skangni Romrang aro Greekrang, salantian mitdeko maniani gimin mitde manigijagipa salko baseode Isolko olakkina man∙jawachim. Mesokanina, Robibaro Salko maniani giminsa Sun’s Day ba Sunday ong∙baaha, Sombar Salo Jajong Mitdeko maniani giminsa Moon Day ba Monday ong∙baaha, Monggolbar salo  Mars ingipa planetko mania aro uko uamang Tiw ine gam∙ata aro unonisa Tuesday ong∙baaha, Budbar Salo Mercury Planetko olakkia aro uko uamang Woden ine minga aro unonisa Wednessday ong∙baaha, Bristibar salo Jupiter Planetko mania jean mikka kimpretatgipa ba Goera ine uamang chanchia aro uko uamang Thor ine gam∙ataonisa Thursday ong∙baaha, Sukrobar salo  Venus Planetko olakkia aro uko uamang Frigg ine gam∙ata aro ua kattaonisa Friday ong∙baaha aro Sonibar Saloara Saturn ingipa planetko olakkibaa aro unonisa Saturday kattaba ong∙baaha.

Niam Gitalo, Jisuni salgichi gadoangani ja∙mano, sninggiparang aro Jihudirangni Pentecostni salko maniani somoio mondoli a∙bachengaha. Uni ja∙mano Antiok Mondolio Uni sninggiparangko Kristian mingchengaha. Ua a∙bachenggipa mondolirang, Watatarangni somoio donggipa mondolini manderangan Robibar salon jinma tom∙dake Isolko olakkibaaha ine Sastroo aro Church Fatherrang ba Pagitchamrangni serikanirango sakki man∙a. “Antini Skanggipa salo, na∙simangoni sakanti, man∙atangtang gita, an∙tangni sepango chimonge donchina, maikai angni re∙baon gilarang ong∙jawa,” (1 Kor 16:2). Ia kattarang, Watata Paulni agangipa ong∙a. Ua somoimitingo Jerusalemo kangal ong∙ani gimin, Paul aro Barnabsa manderangoni ba bebera∙agiparangoni ba Mondolirangoniko tangka gilengachim. Unomitingan uamang Antini skanggipa salo jinma tom∙dake olakkienga aro ua Antni skanggipa salara Robibar, jean Jisuni chakatpilani salba ong∙a. Ian, Constantine Rajana aro Catholic Poperangna baditaba bilsirangna skangan ine nikna man∙gen. Skanggipa Chasongni Mondolirang, jemangan Watatarangni somoiogiparang, uamang Antini Skanggipa Sal ba Robibaron Gitelni Meattamko manironga (Watata 20:7). Una agreba Watatarang baksa janggi tangrimgipa, uamangni somoio Mondoliko rikgipa Church Fatherrangni serikanirangoba Robibar Salo Kristianrang Isolko olakkia ine bang∙a sakkirang donga.

Jisuni singgipa Johan jean Johanni sea Nama Kattako, Johanni Chittiko aro Parapeako seachim, uni chatroara Polycap minggipa ong∙a aro Ireneus minggipaara Polycapni chatro ong∙skaa. Ua (Ireneus), jean Lyons Mondolini Bishop-ba ong∙a ua indine agana, “Gitelni Salna agre gipin salrango Gitel Jisu Kristoni Chakatpilani salko manina man∙ja.” Iano Gitelni Sal ingipa Robibar, jeon Gitel Jisu Kristo siaoni chakatpilaha. Ua kattarangko ua 155 A.D. bilsimangon seaha aro uaba Constantine Rajana baditaba bilsina skangan ong∙a (Volume 8, 773). Justin Martyrba indine agana (AD 100-165( Volume 1, Page 186), “Robibar minggipa salo, chinga songjinmao aro pilak a∙songo songdonggiparang biap damsano tom∙daka, watatarangni aro katchinikgiparangni seaniko poraia. Robibar salo chinga damsan tom∙daka, maina ua salo Isol andalaoniko dingtangataha aro ua apsan salon jokatgipa Gitel Jisu Kristo siaoni chakatpilaha. ” Antiok Mondolini Bishop Ignatius-ba indine agana (110 AD),“Skang chasongni dakbewalo re∙ruragija aro gital ka∙donganiona re∙bae Sabbathko manigija, indiba Gitelni Salna ka∙oksina, jeon an∙chingni janggi uchi tangchaatako man∙a, jedakode an∙ching uni sninggiparang aro Ua an∙chingni skigipa ong∙gen.” Barnabasni Chittio indine agana (120-150 AD), “Nang∙ni jajong jarambongani aro nang∙ni Sabbathko anga chakna amja,” (Isaia 1:13) Na∙a jedake agana, indaken perceive ka∙a, da∙o nang∙ni Sabbathko anga ra∙chakna amja, indiba jekon anga pilaknan neng∙takaniko on∙a, anga chetgipa salni a∙bacheganiko ong∙atgen, uan a∙gilsakni a∙bachengani  ong∙a. Uni gimin chinga chetgipa salo kusi ong∙bee mania, jean an∙chingni Gitel Jisu Kristo sigiminoni chakata.” Skanggipa Chasongni manderang Robibarko Antini Skanggipa ine minga aro basakobade uko Chetgipa ineba minga. Uan Sonibarni ja∙man aro Sonibara Snigipa sal ong∙ani gimin uko Chetgipa sal ineba mingahakon. Bardaisan (154 AD), “Chinga jeoba dongbo, Messiahachi okamako man∙gipa, jekon Kristian minggipa ong∙a, aro antio salsa, jean antini skanggipa salo, chinga apsan tom∙dakronga.” Watatarangni Skiani ingipa ki∙tapoba (160 AD) (Vlume 8, page 668),  “Watatarangko rakkidapaha. Antini skanggipa salo dangdike on∙china aro Rongtalgipa Sastroko poraichina, maina antini skanggipa salo an∙chingni Gitel Jisu Kristo siako donaoni chakatpilaha, ua antini skanggipa salo a∙gilsakona chakataha, antini skanggipa salon ua salgichina gadoangaha.” Cyprian, Bishop of Carthage (200—258 AD) indine agana, “Gitelni Salara antini skanggipa aro Chetgipa Salba ong∙a.”

Kosako janapgipa Church Fatherrangoni bang∙bataan Watatarang baksa olakkirimmangipa, uamangni skianiko knagiparang ong∙a. Watatarangni skianio tol∙ede skijawa ine Kristian sakantian bebera∙na man∙gen. Watatarangni skiakon ong∙ja, daksretgipa ine jeskaode ua dolni manderangkode Kristian ine mingna nambeade ong∙jawa gita nika. Ua kosako janapgipa Church Fatherrang, jemangan Watatarangni skianio pangchake agangiparang ba serikgiparangni agananio, Kristianrang Sonibaro jinma Olakkia inede janapa dongja, indiba Antini Skanggipa ba Robibaro inesa janapbata. Uarangko niate, Kristianrangni Robibaro jinma Olakkianiara Watatarangni skiani ba Skanggipa Kristian dolrangni skiaoni sretbaa ong∙ja ine jajagijan aganna man∙gen.

Sal Gittamni Ja∙mano Jisu Chakatpilama

 

KONTA 72-O JISU CHAKATPILAMA

            Bluwin Ch. Sangma

Jisu siaoni tangchapilaha ine Kristoo bebera∙gipa sakantian bebera∙a aro uko Sastrooba agana. Indiba ua sal gittam walgittamni ja∙mano chakatpilgen ineba aganani gimin, uni siaoni tangchapilaniara sal gittam wal gittam ba konta 72 ong∙bebeama, iani gimin adita jajaanirang donga. Sastroo, agana gita uko Neng∙takani Salna skangan, dok kontamango datkapaha aro sku kontao janggi galaha. Unikoa Neng∙takani Sal sokna skangan Arimathiani Joseph uni bikapko Pilato bi∙e gopaha. Ja∙mano Neng∙takani Salni bon∙kamao aro antini skanggipa sal ba pringo adita sak me∙chikrang gopramo toko nongna re∙angon Jisuni chakatpilako nikaha. Uko niatode uan Sukrobar salo sia aro gopaba gopaha aro Neng∙takani Sal ba Sonibar wal matchote, Robibar pringon chakatpilaha ine nikna man∙gen. Unigimin uan Sukrobar sal paksa aro Sukrobar Attam, Sonibar Sal aro Attamosa gopramo dongani gimin walgni aro Salsa salpaksa ba Walgni salsa adha salsan ong∙aia ine chanchiatna man∙a. Indiba ian, an∙chingni sal jako chananio segija, Jihudirangni chanani gita seani gimin, uamangni chanchianiko u∙ie ra∙naba nanggen. Jihudirangni chanchiani ba sal jako chananio ian, part of three days and three nights ba Sal gittam Walgittamni bako ong∙aniko mesokani ong∙achim.

A∙chikrangni aganritinganio, te∙teng ba tong∙tede bikpilsa re∙a ine agana. Matburingrangni gisepo Kangaroode ki∙sangchina bitine re∙na man∙ja aro do∙orangni gisepo humming bird minggipade ki∙sangchina bikpile bilna man∙a ine agana. A∙chikrang aro a∙gilsakni bang∙bata manderangan, pringoni a∙bachenge attamona chanbaesa salsa ong∙a. Indiba Jihudirangni sal chananiode attamoni a∙bachenge pring seng∙osa bon∙ea. “Aro attam aro pring ong∙ahaoa salsa ong∙aha,” ine agana (Abachenga 1:5). Jisuko so∙otani aro siani beben ua Sukrobar sal ong∙a, indiba sal napkuja, uni gimin ua Bristibar attamoni chanbagipa salni bakan ong∙kuengachim. Uni ja∙mano Sukrobarni sal napaoni Sonibar salona uko salsa chana aro Sonibar Attam aro Robibar Salba salsa ong∙a. Uako niate ba chanesa, uan sal gittam wal gittam ong∙aha ine agana. Beben uan konta 72-de ong∙kuja. Konta 72 ong∙nade Robibar sal gimikko nangkugenchim; indiba uan Sal gittam Wal gittamni bak ong∙ahani gimin, uamangni chanani ba hisapanio pangchake, Sal gittam Walgittam minga ine agana.

Minggipin Jisuko rim∙ani, so∙otani aro gopaniara Neng∙takani Salna skangchim ineba agana. Iano Neng∙takani Sal ingipaba minggni dongachim. Jihudirang, antio changsa Sonibar Salode Neng∙takani Salko manironga aro ua Neng∙takani salara An∙tiprak neng∙takani ba Weekly Sabbath ong∙achim. Gnigipao uamang bilsio changsa Neng∙takani ba Yearly Sabbath, jean Watchangani Salko manianiba ong∙achim. Ua somoion uamang Wantigrigipa Pitakoba cha∙achim. Ia minggni, Yearly Sabbath aro Weekly Sabbath, Jihudirangna namemanchan gamchata ba High Day ong∙ani gimin, maming kamkoba ka∙na man∙jachim. Uamangni bewalo uamang mande siahaon, sal gipinona dongija, siani salon gope galachim. Jisuni sianiara Neng∙takani Salna salsa skang ong∙achim. Uni giminsa Arimathiani Joseph, Jisuni manggisiko Neng∙takani Salna salsa skangan gopaha. Sigimin manggisi ba gopramoba uamang similgipa nonganiko mongsongbate me∙chikrang nongrongachim. Indiba Neng∙takani Salode uamangba nongrongjachim. Unigimin ua me∙chikrangba Jisuni manggisini gopramo Neng∙takani Salo nonggija, salgipinosa nongna re∙angaha aro unosa uamang Jisuni chakatpilako sakki man∙aha.