MAINA KRISTIANRANG ROBIBARO OLAKKIA

 

MAINA KRISTIANRANG ROBIBARO OLAKKIA

                                Bluwin Ch.Sangma

Ia somoio a∙gilsak gimikan ong∙nasipile Kristianrang Robibar salo jinma olakkirima. Indiba uko badiaba badiaba dolrang, Isolni ge∙etgimin Neng∙takani Sal ba Sabbath Ba Sonibar salko pe∙a ine jea.  Ellen G. Whiteni Dal∙begipa Dakgrikani ingipa ki∙tapoba, Sonibaroniko Robibarona dingtangatania 312 A.D bilsio, Constantine rajasa a∙bachengata aro ua salara Salko olakina neng∙takgiparangni salsa ong∙achim ine janapa. Uni ja∙mano Laodikiao, Catholic Pope saksa 320 A.D. bilsio ge∙etanionisa a∙gilsak gimikchian Robibar salo olakkibaskaaha ine agana. Oe, ua aganani gita Israelrang ba Jihudirang Sonibar Salko Neng∙takani Sal ine ra∙a aro 312 A.D. bilsio Constantine Rajaba Robibaro olakibadila aro 320 A.D. bilsio Catholicrangni Pope, Robibar Salo olakkina ge∙etanikoba an∙ching jenade man∙bebejawa. Indiba ua somoionisa Kristianrang Robibar Salo jinma tom∙dake olakkibaaha ine chanchiode ian mondolini itihasko name talaha inede aganna man∙jawa. An∙chingni olakkibaani a∙bachenggipa mondoli ba Kristianrangni olakiaoni dingtangbaode uan gualbeani ong∙gen, indiba a∙bachenggipa Kristian ba Mondoli jekon dakbaaha, uko ja∙rikbaode daksretgipa ine aganna man∙jawa. Namedake sandiode, a∙bachenggipa Mondoli ba Kristianrangni dakrongaoni dingtangbaosa daksretgipa ine aganna man∙gen. Kosako janapgimin gita Kristianrang maina Robibar Salo olakkia ine sing∙ode, iani gimin aditako ka∙mao mesokna man∙gen.

Keith Piperni, Answers, ingipa ki∙tapo, Saturday  ba Sonibar ba Sabbath-ko manianiara Jihudi aro Isol baksa ko∙monggrikani ong∙a, jekon sign of Mosaic Covenant ine talata aro uan Sastro Reongkata 31:13-17-o pangchake aganani ong∙achim. Beben ia kattarangko dingtang dingtang dake pe∙na man∙naba donga. Indiba iani gimin a∙bachenggipa mondolirangni kamrango, aro 300 A.D-na badita bilsi skang, Constantine Rajana badita bilsi skangan Kristianrang Robibar Salo damsan olakkibaa ine bang∙a sakkirangko nikna man∙gen. Minggipin Robibar salo olakkianiara Salni mitdeko olakkiani giminsa Sun ba Sunday ingipa katta ong∙baa ine agananirangkoba knana man∙a. Iani bidingo batanggimin issue-o adita talataha, indiba ukoba mesokattaina nangnikenga. Skangni Romrang aro Greekrang, salantian mitdeko maniani gimin mitde manigijagipa salko baseode Isolko olakkina man∙jawachim. Mesokanina, Robibaro Salko maniani giminsa Sun’s Day ba Sunday ong∙baaha, Sombar Salo Jajong Mitdeko maniani giminsa Moon Day ba Monday ong∙baaha, Monggolbar salo  Mars ingipa planetko mania aro uko uamang Tiw ine gam∙ata aro unonisa Tuesday ong∙baaha, Budbar Salo Mercury Planetko olakkia aro uko uamang Woden ine minga aro unonisa Wednessday ong∙baaha, Bristibar salo Jupiter Planetko mania jean mikka kimpretatgipa ba Goera ine uamang chanchia aro uko uamang Thor ine gam∙ataonisa Thursday ong∙baaha, Sukrobar salo  Venus Planetko olakkia aro uko uamang Frigg ine gam∙ata aro ua kattaonisa Friday ong∙baaha aro Sonibar Saloara Saturn ingipa planetko olakkibaa aro unonisa Saturday kattaba ong∙baaha.

Niam Gitalo, Jisuni salgichi gadoangani ja∙mano, sninggiparang aro Jihudirangni Pentecostni salko maniani somoio mondoli a∙bachengaha. Uni ja∙mano Antiok Mondolio Uni sninggiparangko Kristian mingchengaha. Ua a∙bachenggipa mondolirang, Watatarangni somoio donggipa mondolini manderangan Robibar salon jinma tom∙dake Isolko olakkibaaha ine Sastroo aro Church Fatherrang ba Pagitchamrangni serikanirango sakki man∙a. “Antini Skanggipa salo, na∙simangoni sakanti, man∙atangtang gita, an∙tangni sepango chimonge donchina, maikai angni re∙baon gilarang ong∙jawa,” (1 Kor 16:2). Ia kattarang, Watata Paulni agangipa ong∙a. Ua somoimitingo Jerusalemo kangal ong∙ani gimin, Paul aro Barnabsa manderangoni ba bebera∙agiparangoni ba Mondolirangoniko tangka gilengachim. Unomitingan uamang Antini skanggipa salo jinma tom∙dake olakkienga aro ua Antni skanggipa salara Robibar, jean Jisuni chakatpilani salba ong∙a. Ian, Constantine Rajana aro Catholic Poperangna baditaba bilsirangna skangan ine nikna man∙gen. Skanggipa Chasongni Mondolirang, jemangan Watatarangni somoiogiparang, uamang Antini Skanggipa Sal ba Robibaron Gitelni Meattamko manironga (Watata 20:7). Una agreba Watatarang baksa janggi tangrimgipa, uamangni somoio Mondoliko rikgipa Church Fatherrangni serikanirangoba Robibar Salo Kristianrang Isolko olakkia ine bang∙a sakkirang donga.

Jisuni singgipa Johan jean Johanni sea Nama Kattako, Johanni Chittiko aro Parapeako seachim, uni chatroara Polycap minggipa ong∙a aro Ireneus minggipaara Polycapni chatro ong∙skaa. Ua (Ireneus), jean Lyons Mondolini Bishop-ba ong∙a ua indine agana, “Gitelni Salna agre gipin salrango Gitel Jisu Kristoni Chakatpilani salko manina man∙ja.” Iano Gitelni Sal ingipa Robibar, jeon Gitel Jisu Kristo siaoni chakatpilaha. Ua kattarangko ua 155 A.D. bilsimangon seaha aro uaba Constantine Rajana baditaba bilsina skangan ong∙a (Volume 8, 773). Justin Martyrba indine agana (AD 100-165( Volume 1, Page 186), “Robibar minggipa salo, chinga songjinmao aro pilak a∙songo songdonggiparang biap damsano tom∙daka, watatarangni aro katchinikgiparangni seaniko poraia. Robibar salo chinga damsan tom∙daka, maina ua salo Isol andalaoniko dingtangataha aro ua apsan salon jokatgipa Gitel Jisu Kristo siaoni chakatpilaha. ” Antiok Mondolini Bishop Ignatius-ba indine agana (110 AD),“Skang chasongni dakbewalo re∙ruragija aro gital ka∙donganiona re∙bae Sabbathko manigija, indiba Gitelni Salna ka∙oksina, jeon an∙chingni janggi uchi tangchaatako man∙a, jedakode an∙ching uni sninggiparang aro Ua an∙chingni skigipa ong∙gen.” Barnabasni Chittio indine agana (120-150 AD), “Nang∙ni jajong jarambongani aro nang∙ni Sabbathko anga chakna amja,” (Isaia 1:13) Na∙a jedake agana, indaken perceive ka∙a, da∙o nang∙ni Sabbathko anga ra∙chakna amja, indiba jekon anga pilaknan neng∙takaniko on∙a, anga chetgipa salni a∙bacheganiko ong∙atgen, uan a∙gilsakni a∙bachengani  ong∙a. Uni gimin chinga chetgipa salo kusi ong∙bee mania, jean an∙chingni Gitel Jisu Kristo sigiminoni chakata.” Skanggipa Chasongni manderang Robibarko Antini Skanggipa ine minga aro basakobade uko Chetgipa ineba minga. Uan Sonibarni ja∙man aro Sonibara Snigipa sal ong∙ani gimin uko Chetgipa sal ineba mingahakon. Bardaisan (154 AD), “Chinga jeoba dongbo, Messiahachi okamako man∙gipa, jekon Kristian minggipa ong∙a, aro antio salsa, jean antini skanggipa salo, chinga apsan tom∙dakronga.” Watatarangni Skiani ingipa ki∙tapoba (160 AD) (Vlume 8, page 668),  “Watatarangko rakkidapaha. Antini skanggipa salo dangdike on∙china aro Rongtalgipa Sastroko poraichina, maina antini skanggipa salo an∙chingni Gitel Jisu Kristo siako donaoni chakatpilaha, ua antini skanggipa salo a∙gilsakona chakataha, antini skanggipa salon ua salgichina gadoangaha.” Cyprian, Bishop of Carthage (200—258 AD) indine agana, “Gitelni Salara antini skanggipa aro Chetgipa Salba ong∙a.”

Kosako janapgipa Church Fatherrangoni bang∙bataan Watatarang baksa olakkirimmangipa, uamangni skianiko knagiparang ong∙a. Watatarangni skianio tol∙ede skijawa ine Kristian sakantian bebera∙na man∙gen. Watatarangni skiakon ong∙ja, daksretgipa ine jeskaode ua dolni manderangkode Kristian ine mingna nambeade ong∙jawa gita nika. Ua kosako janapgipa Church Fatherrang, jemangan Watatarangni skianio pangchake agangiparang ba serikgiparangni agananio, Kristianrang Sonibaro jinma Olakkia inede janapa dongja, indiba Antini Skanggipa ba Robibaro inesa janapbata. Uarangko niate, Kristianrangni Robibaro jinma Olakkianiara Watatarangni skiani ba Skanggipa Kristian dolrangni skiaoni sretbaa ong∙ja ine jajagijan aganna man∙gen.