Sal Gittamni Ja∙mano Jisu Chakatpilama

 

KONTA 72-O JISU CHAKATPILAMA

            Bluwin Ch. Sangma

Jisu siaoni tangchapilaha ine Kristoo bebera∙gipa sakantian bebera∙a aro uko Sastrooba agana. Indiba ua sal gittam walgittamni ja∙mano chakatpilgen ineba aganani gimin, uni siaoni tangchapilaniara sal gittam wal gittam ba konta 72 ong∙bebeama, iani gimin adita jajaanirang donga. Sastroo, agana gita uko Neng∙takani Salna skangan, dok kontamango datkapaha aro sku kontao janggi galaha. Unikoa Neng∙takani Sal sokna skangan Arimathiani Joseph uni bikapko Pilato bi∙e gopaha. Ja∙mano Neng∙takani Salni bon∙kamao aro antini skanggipa sal ba pringo adita sak me∙chikrang gopramo toko nongna re∙angon Jisuni chakatpilako nikaha. Uko niatode uan Sukrobar salo sia aro gopaba gopaha aro Neng∙takani Sal ba Sonibar wal matchote, Robibar pringon chakatpilaha ine nikna man∙gen. Unigimin uan Sukrobar sal paksa aro Sukrobar Attam, Sonibar Sal aro Attamosa gopramo dongani gimin walgni aro Salsa salpaksa ba Walgni salsa adha salsan ong∙aia ine chanchiatna man∙a. Indiba ian, an∙chingni sal jako chananio segija, Jihudirangni chanani gita seani gimin, uamangni chanchianiko u∙ie ra∙naba nanggen. Jihudirangni chanchiani ba sal jako chananio ian, part of three days and three nights ba Sal gittam Walgittamni bako ong∙aniko mesokani ong∙achim.

A∙chikrangni aganritinganio, te∙teng ba tong∙tede bikpilsa re∙a ine agana. Matburingrangni gisepo Kangaroode ki∙sangchina bitine re∙na man∙ja aro do∙orangni gisepo humming bird minggipade ki∙sangchina bikpile bilna man∙a ine agana. A∙chikrang aro a∙gilsakni bang∙bata manderangan, pringoni a∙bachenge attamona chanbaesa salsa ong∙a. Indiba Jihudirangni sal chananiode attamoni a∙bachenge pring seng∙osa bon∙ea. “Aro attam aro pring ong∙ahaoa salsa ong∙aha,” ine agana (Abachenga 1:5). Jisuko so∙otani aro siani beben ua Sukrobar sal ong∙a, indiba sal napkuja, uni gimin ua Bristibar attamoni chanbagipa salni bakan ong∙kuengachim. Uni ja∙mano Sukrobarni sal napaoni Sonibar salona uko salsa chana aro Sonibar Attam aro Robibar Salba salsa ong∙a. Uako niate ba chanesa, uan sal gittam wal gittam ong∙aha ine agana. Beben uan konta 72-de ong∙kuja. Konta 72 ong∙nade Robibar sal gimikko nangkugenchim; indiba uan Sal gittam Wal gittamni bak ong∙ahani gimin, uamangni chanani ba hisapanio pangchake, Sal gittam Walgittam minga ine agana.

Minggipin Jisuko rim∙ani, so∙otani aro gopaniara Neng∙takani Salna skangchim ineba agana. Iano Neng∙takani Sal ingipaba minggni dongachim. Jihudirang, antio changsa Sonibar Salode Neng∙takani Salko manironga aro ua Neng∙takani salara An∙tiprak neng∙takani ba Weekly Sabbath ong∙achim. Gnigipao uamang bilsio changsa Neng∙takani ba Yearly Sabbath, jean Watchangani Salko manianiba ong∙achim. Ua somoion uamang Wantigrigipa Pitakoba cha∙achim. Ia minggni, Yearly Sabbath aro Weekly Sabbath, Jihudirangna namemanchan gamchata ba High Day ong∙ani gimin, maming kamkoba ka∙na man∙jachim. Uamangni bewalo uamang mande siahaon, sal gipinona dongija, siani salon gope galachim. Jisuni sianiara Neng∙takani Salna salsa skang ong∙achim. Uni giminsa Arimathiani Joseph, Jisuni manggisiko Neng∙takani Salna salsa skangan gopaha. Sigimin manggisi ba gopramoba uamang similgipa nonganiko mongsongbate me∙chikrang nongrongachim. Indiba Neng∙takani Salode uamangba nongrongjachim. Unigimin ua me∙chikrangba Jisuni manggisini gopramo Neng∙takani Salo nonggija, salgipinosa nongna re∙angaha aro unosa uamang Jisuni chakatpilako sakki man∙aha.