KRISTIANARA VACCINE SUMALAMA

 

KRISTIANARA VACCINE SUMALAMA

                                    Bluwin Ch. Sangma

Songadamni song damsao balwa ta∙rakbegipa balbaon, saksa mandeni  nokko man∙angna man∙angna dakaha. Ua mande, chasongnaba Isolo bi∙a dongkuja, indiba ua somoiode ua indine Isolo bi∙na a∙bachengaha, “Aiao….angkomangmangde donpakubo, angni-jikko-dekoan jeba dakangbo. Aiao…, angkomangmangde donpakubo, angni jikko dekoan jeba dakangbo.”  2019 bilsio Chinani Wohan songjinmao atchigipa Corona Virusni, a∙ni a∙bigilo chini chibilo donggipa premko chimjemko cha∙skal-cha∙kamalangon aro uko sanna banna maming chol dongjaengon, a∙gilsak jadachangaha. A∙gilsakni bang∙a biapon rama den∙pengjok, do∙ga ketchangjok. School, College, Universityrangkoba chipaha. Olakkiram biaprangko chipaha, bazaar-anti cha∙anirang dongjaha, bading-chiwalgiparang, ge∙e-game cha∙gipa darangan palna-botna neng∙nikbeaha. Uandakmiting somoio, bang∙a bebera∙gipaan Isolo bi∙tokaha aro mitamrangde chasongnaba Isolo bi∙e nikgijamangba ua somoiode bi∙enggnok ine anga chanchiate nibeenga.  Sigipa bon∙gipa, sagipani gimin aganna man∙piljaha, indiba bilsisamangni ja∙mano, uako champengsona Vaccineko su∙naba man∙aha. Vaccineko su∙na man∙ahaode, scientistrang, medical expertrang, doctorrang aro a∙songko sason ka∙giparangba sko saani namkalgnok ine chanchienggenchim, indiba ong∙nade man∙srangjaenga. Uko su∙giparang bang∙genchimoba, uko su∙na beng∙giparang, jajagiparang aro kengiparangba bang∙ean dongkuaenga. Uko su∙na kengiparang aro su∙kugijagiparang, an∙chingni A∙chik a∙songosan ong∙aigija, a∙gilsakni dingtang dingtang biaprangon dongkua. Ian an∙ching sakantini chanchina nanggipaan aro ukode diksil dal∙kalao ritna nanggipaan ong∙a. Uan, ritchenge ra∙na nanggipade ong∙ja.

A∙gilsakni dingtang dingtang biaprango, dingtang dingtang toromrang donga.  Ia pilak toromni manderangan an∙tangtangni olakkigipako nambate nika aro darang toromba an∙tangni ja∙rikgipa toromni dakbewalko ong∙siatna, gimaatna ba maiba namgijako dake, Isol ba mitdeni doke skiani ba bichalko man∙na sikja. Uandake olakkiani ba bebera∙ani bewalko ong∙siatnagipa ba gimaatnagipara, Corona Virusni Vaccineba ong∙a ine, bang∙a toromni bebera∙gipa aro mitamrangde skigipa ba dilgiparangba agana.

Indiao bang∙batgipa ba jelbatgipa manderangde, Hindu toromko ja∙rikgipa ba bebera∙giparangan ong∙a. Uamang an∙tangtangko rongtale janggi tangna ska aro skangonin, Sudra ba chongipa jat ba gipin toromni manderangming cha∙brin-ringbrine marang nangatjana chanchigiparang ong∙a. Apsan daken ia Corona Virus Vaccineara Hindu toromko rongtalgija ong∙atna ba marang nangatna (defile) a∙gilsakni dingtang dingtang manderangni chanchiaonisa ine saksa Hindu toromni dilgipa agana

Greek orthodoxni Bishop saksa, Covid Vaccine-de ong∙gijagipa wantiko bringipasa ong∙ani gimin, ukode su∙na ba ra∙na nangjawa ine agana. Wanti ian, skiani, ba bebera∙aniko miksonga. Jisuba,   Herodni wantina mikrakna nangani gimin agana aro uan Herodni ba uni dolni ong∙gija skiani ba chanchianina mikrakna nangani giminsa agana. Israelni saksa skigipa ba Rabbi ia Corona Virusni Vaccineara, manderangko gay ong∙atgen, unigimin uko Israel manderangde su∙na nangjawa ine skiskaa. Zambiani saksa Evangelist aro Politician, Dr. Nevers Sekwillia Mumba, Zambiao darangba vaccine su∙na nangjawa ine aganaha. Badiaba badiaba Kristian dolrang, mitamde Americani aro dingtang dingtang a∙songni Kristianrang, Covid Vaccinede Sastroo agangipa 666 numbersa ong∙ani gimin ukode su∙na kraja ine agana ba skia. Sastroo, be∙en gisik aro janggini ong∙sigija dongna nangani gimin agana. Covid Vaccinde an∙chingni be∙enko ong∙siata (defiled) unigimin  uko ra∙na ba su∙na nangja ine mitam mitam Kristian dolrang skiskaa.  Mitamranga, vaccineode microchips dongani gimin uko su∙na nangja, mitamranga uan Isolo bebera∙gijagiparangni kamsa, bebera∙giparangde vaccine su∙gija, nokgipaon pangchakna nanga ine agana ba skiskaa.

            “I am not a scientist, you are not a scientist,” ine Assemblyo jera ra∙mitingo an∙chingni Ministerrangoni saksa aganaha. Apsan daken an∙chingba pilakande scientist, medical expert, virologist ba medical doctorde ong∙tokja. Unigimin chinga Grikjadil Team gitaba, doctorrang, scientistrang, medical expertrang aro virologistrangni agana gitade aganna ba niatna nangnikjaenga. Indiba bebera∙gipa ong∙e, bebera∙giparangni dakgni ba daitokosa niatna nangnikenga. Bebera∙gipa gita niatengon, manderangni jajaanirango pangchake an∙ching minggniko niate nina. Skanggipa jajaani ba sing∙aniara, Vaccineara sam ong∙ani gimin, Kristian ong∙e, samko jakkalna, ringna ba biji su∙na kraama kraja ingipa aro gnigipao, Vaccineara 666 number ong∙ama ong∙ja, uno pangchake niangna.

Kristianara Sana-Bananiko Nangama

            Samko jakkale sana-bananiara, bebera∙giparangni kam ong∙ja, uan an∙tangtang Isolo ka∙dongna man∙gijaniko mesoka ine mitam mitam Kristian dolrang agana ba skia. Bebera∙giparangde, Isolo bi∙achi Isolo ka∙donganichisa namatna ama ine uamang bebera∙a. Oe, an∙ching bebera∙giparang ong∙e, saaniko namatna Isolo bi∙na nanga, Isoloan ka∙dongna nanga, uan an∙chingni dal∙batgipa oja ba doctor ba scientist ong∙a. Indake ong∙oba, bebera∙giparang a∙gilsakni samkode jakkalnabe, samko jakklode na∙simangni bebera∙ani komia, sam jakkalgipani bi∙anikode knachakjawa ine agananikode an∙ching nikskaja. Una agreba, Sastroo aro Jisuni somoiomangba a∙gilsakni samko jakkalna nanganiko an∙ching nikna man∙a.

            Isolni mande ong∙e, saa namjaode, kangal ong∙ode, neng∙skime janggi tangode, Isolni saoko man∙gipa ine mitamrang chanchia aro mitam skigiparang, mitam dal∙gipa skigiparangba uandake skigiparang donga. Uandake skigiparangoni Benehinba ong∙a. Ua changsao, “Anga manderangko brangataha, manderang Jisuona re∙baode saanirang dongjawa, man∙e cha∙gen ine skiaha. Iandake skina angko ja∙ga nangataha. Anga chisolni giminde skijaha,” ine grappile aganaha. Oe, Kristian ong∙e isigangpakari, salang-walang bangka nangao donge, betbong betbong cha∙anide ong∙jawa. Ua, saoba angko ja∙rikode ua an∙tangko jechina aro an∙tang chisolko ripee un baksa re∙bapachinasa aganani gimin, uano duk chakna nanganiba donga ine nikatna man∙a. Ua, Uko ja∙rikna am∙gipa mande saksana, perurangni a∙kol gnang, do∙orangni bitip gnang, indiba mandeni depanteni skotangko donchakna biap gri ineba agana (Luk 9:57-58). Watata Paulba, Kristo Jisuni nama sipai gita angming duk chakpabo ineba Timothyna aganaha. Ian, bebera∙giparangni janggi tanganio, neng∙nikaniba ja∙rika ine mesokani ong∙achim.

            Watata Paul Kristoni duk chakani, siani aro tangchapilani gimin sakki on∙ano bang∙a dukkon chakaha, chipu sua man∙aha, jahat dubiaha, betsmitchi dokaha, saanirangko man∙aha. Unigimin uaba uoniko bu∙suko ba saaniko ra∙angchina Isolo bi∙aha, indiba Isol una Uni ka∙saani chu∙onga inesa aganchakaha. Timothy saksa Isolni nokkol nokkol pamong ong∙a, indiba uoba ok saani, jean gastric ba chupal saani dongachim. Haida uaba saksa dilgipa ong∙ani giminan samkoba ringjaengachimkon. Indiba, Paul uni bimema jimjemana, chikosan ringaigija, on∙tisa drakka bitchikoba ringna aganaha. Ua somoio, da∙o gita sana-banani cholrang bang∙ede dongkuja, indiba ok saanina drakka bitchikoan jakkalachim. Unigiminsa ua, on∙tisa drakka bitchiko ringchina aganaha aro uan, a∙gilsakni samko jakkalna nanganiko mesokani ong∙achim. Jisuba Uni Namgipa Samariako toe aganon, sanramona ra∙ange sananiko aro sananina dam gamaniko janapa aro uarangba a∙gilsakni samko jakkalna nanganiko mesokani ong∙achim.

            Harding Theological Collegeni Principal gitcham, Dr. Sallindro R. Marak, an∙chingni sana-banani, sanram ba hospitalrangba Healing Ministry ba An∙sengatanina Dangdikanian ine agana. Indiao nambatgipa hospitalrangoni damsa, CMC Vellore Hospitalkoba Kristianrangan chalaienga. Turaoba Christian Hospital, Holy Cross Hospital, Jengjal SDA Hospital aro uandaken dingtang dingtang biaprango dingtang dingtang Kristian dolrangni chalaigipa hospitalrangba Healing ministry-an ine aganna man∙gen. Dingtang dingtang songjinmarango, banoba HIV/AIDS-ko sangiparang, konchi cha∙giparangko sangiparangba healing ministryan ong∙a. Ua konchi cha∙giparangna, HIV/AIDS man∙giparangna, Drugs Addict ong∙giparangna maming sana-bananiko on∙gija, Isolo bi∙mangmangari, na∙simangko Isol an∙sengatchina ine aganmangmangari dongode uan nambeade ong∙jawa. Uarangko Healing Ministry ine chane, Corona Vaccineko Healling Ministry ine chanskagijaniba krabeanide ong∙jawa gita nika.

Corona Virus Vaccineara 666 Numberma

            Corona Virus Vaccineko su∙na kenani mingsaara, uade 666 numbersa ong∙ani gimin Kristianrang ba bebera∙giparangde uko su∙na nangja ine mitam mitam bebera∙gipa aro skigiparang agana. Oe, uandake sing∙anirang aro jajaanirang dongon an∙ching jekoba sapakako cha∙a gita dakskelani, ba aganskelanide ong∙jawa. Bebera∙giparang ong∙e, uandakgipa aganani ba chanchiani ba jajaanirang dongengon, uarangni gimin Sastroo maiko agana, an∙chingde ukosa niskana nanggen. 2020 bilsini December jani issueoba chinga, Aadhaar Card-ara 666 numberma ine sing∙anina aditako talataha. Iani gimin Parapea 13-ko aditan talataniko on∙aha. Parapea 13-o janapgipa 666 numberara mandeni ba matburingni number ine agana. Maini gimin Corona Virus Vaccineko 666 number ine agana, aditako an∙ching niange nina.

            Corona Virusna Vaccine su∙anina kenna skangba, manderang 666 numberni gimin dingtang dingtang dake kenanirang bang∙en dongaha. An∙chingni India a∙songko skangode, dingtang dingtang a∙songrang sason ka∙a aro bon∙chotede, British manderang sason ka∙a. Britishrangni somoioba, raja ba ranirangchisa sason ka∙ani gimin uko monarchy ine agana. India, 1947 bilsini August 15 tarikosa jakgitel ong∙aha aro ua somoioni India an∙tang biltang jaktangchi sason ka∙aha. India jakgitel ong∙aonin, Indiao sasonni bidingo Democracy,  manderangni seokako man∙gipaan sorkari, manderangchin sorkari aro manderangna sorkari ingipako ra∙gataha. Ia Democracy ong∙ahaode, uan an∙tangtangan raja ong∙na krengani gimin, uan anti Christ ba 666 number ong∙gen ine kentokbeaha ine agangiparangba donga. Jensalo, Sadam Hussain Americani kosako chakata, unon Sadam Hussainan a∙gilsak gimiko sason ka∙gen aro uan Anti-Christ, uni number-an  666 number ine agangiparangba donga. Mitam mitam manderanga, Nero rajasa, Kristianrangko mitchigipa ong∙ani gimin uasa Antichrist, uni numberan 666 number ine aganskaa. Saoba saobarangara, Catholicrangni Pope-an Anti Christ, uni number-an 666 number ine agangiparangba donga. Mitam mitam manderanga Bin Ladenan Anti Christ aro uni numberan 666 number ine aganskaa.  Saoba saobarangara, Barak Obamasa Anti Christ, uni gimin bini numbersa 666 number ine aganskaa. Mitamranga, International Fund For Agricultural Development (IFAD) Anti Christ, uni numbersa 666 number ong∙a ine agana. Mitamrangara, 666 numberde Russia, mitamrang China, mitamrang, International Monetary Fund, mitamranga World Wide Web, mitamranga, International Network (Internet), mitamrang Election Identity Card, mitamrang Job Card, mitamrang Aadhaar Card aro uandaken da∙o manderangni gitalbate kengipaara Corona Virus Vaccine ong∙a. An∙chingni India Sorkari aro gipin gipin a∙songrangni dilgiparangan, a∙songni mande sakantikon ua vaccineko su∙china agana ba ge∙eta. Indake ong∙oba uko su∙na kengiparang aro jechakgiparang bang∙ani gimin, haida mitam mitam a∙songni sorkaride, uko su∙gijagipade, bazaar anti cha∙na, office re∙na, school college re∙na man∙jawa, uni gimin a∙songni pilak mandean uko su∙na nanggen ine ge∙etanirangba dongade dongakon. Uko niate uan, Parapeao agangipa matburingni number 666, aro uko ra∙gijagipana agrede darangba palna aro brena man∙jawa ine agangipaming apsan ong∙a ine chanchiesa uko su∙na kena ba beng∙akon.

            Oe, uandake aganani aro ge∙etanirang dongengnaba donga, indiba ua Sastroo janapgipaara maidakgipa aro ia Covid Vaccineko su∙na agangipaara maia, uni dingtanggrika aro apsananikoba name ninade nanga. Parapea 13-o agangipaara, olakkiani aro bebera∙ani gimin agangipa, indiba Covid Vaccineara, maming bebera∙ani ba olakkiani bidingode nangchapja ine bang∙a Isolni manderangan aganskaa. Minggipin, Corona Virus Vaccineko su∙gijagipa pilakande Kristoko bebera∙gipararade ong∙taija aro Vaccine su∙giminrangoni bang∙aan Kristoko bebera∙giparangba donga. Unigimin ramram an∙chingni gisik ba common senseko jakkale sing∙anio, Kristoko ra∙chakgija ba bebera∙gija, Corona Virus Vaccineko su∙gijagipa aro Kristoko bebera∙eba Vaccine su∙gipani gisepo, badiako matburingni number ong∙na krabatgen. Bebe gita Corona Virus Vaccine-an 666 number ong∙ode uko su∙giparangde Kristoko bebera∙oba ra∙jaoba jokjaengjok aro Kristoko ra∙chakbo ba ra∙chakjabo, Corona Virus Vaccine-ko su∙gijagiparangde 666 number-ko ra∙jani gimin jokatako man∙na kraskaa. Sastroode bebera∙gipaan jringjrotni janggiko man∙aha ine agana (Johan 5:24). Vaccine su∙gijagiparangsan jokaniko man∙aiode, Jisuko bebera∙oba ra∙jaoba janggi jokako man∙na kraa, indiba uan, “Bebera∙gipaan jringjrotni janggiko man∙aha,” ingipamingde meliskaja. Ong∙jaode, “Vaccine su∙gijagiparang jringjrotni janggiko man∙aha,” ine aganna man∙genchim. Minggipin jokataniara, ka∙sao bebera∙achisa ong∙a aro uan kamoni ong∙ja ineba agana (Ephesus 2:6--). Vaccine su∙giparara joka man∙gija, vaccine su∙gijagiparangsa joka man∙aiode, ianoba an∙chingni kamchi, ba gelanichisa man∙a ga∙akengjok aro uan, “kamoni ong∙ja” ingipamingde meliskajaengaha. An∙chingni aganani ba skiani ba chanchiani, Sastroo aganaming apsan ong∙ode an∙ching ukosa ja∙rikna aro Sastro gita ong∙jaode uandakgipa skianiko ja∙rikna nambea ong∙jawa.