REV. GADASING M MARAK KAN∙DIKGIPA ITIHAS

 

REV. GADASING M MARAK KAN∙DIKGIPA ITIHAS

Rev. Gadasing M. Marakni gimin nambate u∙igiparangde, Krima VI aro Boldamgre Mondolini manderangan ong∙gen. Chinga uni gimin name u∙ijaoba, uko Krima IX, Mouza No. III aro Teksragre Mondoliba gualnade man∙jawa. Uan. Mouza No.III, da∙ode Krima No.IX aro unoni ong∙katanggipa Krima No. XIV jolona ABDK-ni procharok ong∙e watatchengako man∙gipa ong∙a. Ua, diltugipa buring a∙jangchi, matchadam-mongmadamko minggija wenaha aro uni kam ka∙ani adita bilsini ja∙mano, Krima IX-o Kristoo bebera∙giparang ong∙katrikrikbae, mondolirangba bang∙rorobaaha. Chingni Teksragre Mondolikoba uan, 1973 bilsini February 1 tariko songe on∙eaha.

Atchiani

Rev. Gadasinghni pagipa, saksa mingsinggipa reverend, Rev. Tokan M. Sangma aro ma∙gipaara Narang M Marak ong∙a. Ua, 1916 bilsini September 30 tariko, Boldamgre Mondolini  Gandigre  song ba Bipeko, atchiaha. Uni pagipa, Rev. Tokan M. Sangma an∙tangan Isolni mondolio rake kam ka∙gipa ong∙ani gimin depanteko rake kam ka∙anikon nangnikgipa ong∙achim. Uni giminsa ua depante atchiahaon, “Angni ja∙man-ja∙wilo, Gada gita chilkan mongma gita gatkan,” ine Gadasingh mingaha ine, Krima VI-ni Executive Secretary gitcham, Rev. Ijona A. Sangmani serikanio talata. Pagipani miksonga gitan ua, Isolni a∙bao ru∙uta bilsina rakbee kamko ka∙angaha.

Poraiani

Rev. Gadasingh Marak, 1920 bilsioni 1923 bilsiona Boldamgre L.P.Schoolo poraiaha. Uni ja∙mano poraidapangna skuoba, sambajolode chubata gadangni skul dongjae man∙ningjaha. 1934 Marcha 21 tariko, Turao Soba School ingipako Class VII-ona kuliaha. Uko knaahaon ua uano poraina chanchiaha. Ua,Turaona re∙bae, Tura Mission Schoolni Headmistress ong∙enggipa, Miss Ferm Marie Roldni noko donge poaraiaha. Poraimitingo ua, uni nokgipani paganrangko nirokan baksa kam ka∙roroe poraie, 1935 bilsio Class VII-ko passed ka∙aha. Unikoa ua, 1937 bilsio, Class VIII-o poraina Goalparachi re∙angaha, indiba ma∙a-paa tangka-paisana neng∙nikani gimin ua poraianiko dontonge songtangona re∙bapilaha. Ua bilsion pagipa saa bilonge sinasiaha. Ua sina skang depantena maikoba aganna am∙aha, indiba man∙jaha.

Pagipani Ku∙pattiani

Kosako janapgimin gita, pagipa sina skang depantena maikoba aganna am∙achim, indiba man∙jaha. Unigimin ua, lekkao indake seangaha, “Na∙a a∙gilsakni janggi tanganio aro an∙tangni skanio pangchaknabe, iarang dikdiksanasan ong∙aia. Indiba seng∙sote Isolni sengsoaniko nibo. Anga nang∙ko da∙alo bangbanggipa bakrao wate re∙angenga. Na∙a pilakna skang nokgimikni manderang baksa nangrimchengbo; unode sakgipin manderangkoba apsan nangrimaniko nikgen. Pil∙e, dukni aro sukni salo chanchie nibo, anga nang∙na mamingkoba donangna man∙ja, indiba anga pangnan nang∙ni tom∙tomaniko, nangrimaniko aro ka∙saaniko am∙a.” Uano pagipani ku∙pattianga gitan ua janggi tangangaha.

(Chu∙gimikko Teksragre Mondolini Golden Jubilee Souveniro man∙gen )