TEKSRAGRE SONG ARO MONDOLINI KAN∙DIKGIPA ITIHAS

 

TEKSRAGRE SONG ARO MONDOLINI KAN∙DIKGIPA ITIHAS

                        Bluwin Ch. Sangma, Pastor, Teksragre Baptist Church

A∙chik A∙songo Teksragre minggipa songrang aditan donga, indiba iano senokgipa Anogre sambajol, Didram, Dirik aro Didak bisiko donggipa Teksragreko miksonge sea. Iano, ua songko maina Teksragre minga, sawarang songdong-a∙chachenga, uno maidakgipa gisik ra∙na kragipa biap-a∙damrang, abri-chirangrang donga uarangni gimin adita talata. Una agreba maikai Kristoni songnok sokbaaha, uarangkoba kan∙dike talata. Songni ong∙baani gimin mamingba see-tote dona dongjae, aganrtingaosa pangchakani gimin namedake tik ong∙sranga inede aganna man∙jawa. Una agreba saniba saniba agananirang dingtang dingtang ong∙na man∙aia. Mande gitchamrangde dongtokjani gimin, jeko da∙o dongenggiparang agana, uarango pangchakesan seaiaha.

Songko Teksragre Mingbaani

Teksragre ian, Anogre songoni Saliramchipak donga. Uan, A∙chik A∙songo a∙dok dal∙batgiparangoni damsa ong∙gen. Songgitchamo Rogiparang Bolma Bite Cha∙giparangni, wagam warongsigipa kni matram pigiparangni ku∙ritingchi aganritingani gitade, chengo Dura Ranggirako a∙ba cha∙gipa Teksra Minda Wal∙jrapa minggipa dongachim. Uasa biaptang a∙damtangko dongtonikjae, biap gital a∙dam dingdangko sandirorobae, da∙oni Teksragreona katbae, kosi songe a∙song tate, songa songdongchengaha chiga chiringchengaha. Teksra Minda Wal∙jrapani de-su∙drang jelbra-jelsuae, song damsa ong∙ahaon, ua biap ba songko Teksragre mingbaaha ine agana. Uamang chengo-chengonian, dingrak-kerakgipa aro bobil dingo-ginal rikoba amronga-cherongani gimin, uamangni songkode Grong-Gitchak ineba mingachim ine aganani donga.

Gittimrang

Teksragre song, A∙chik A∙songo dal∙batgipa songrangoni damsa ong∙a. Ian Salaramchipak Silsekgre aro Anogre, Salgrochipak Renchagre, Saliramchipak Manggakgre, Salgipengchipak Ditigre, Salgipeng-Saliramchipak Aigre sambao donga. Song aditan dal∙ani gimin gittimrangba aditan donga. Mitam gittimrangde, bilsi sokbaroro, gittimrangba dongbaroroaia. Adita mongsonggipa gittimrangko ka∙mao gita niangna:

Jakonggre

            Adita bilsini ja∙mano, A∙chik A∙songni dingtang dingtang biaprangchin, Chram Waknachile, Akgal Do∙bodoke maming mamingkon cha∙na man∙jachim. Unomiting uamang, ta∙skoko am∙oba nikja, mikjarengko tinnaba man∙ja ine agana. Mi dongjani gimin saoba saobarangde me∙bitchiko song∙e cha∙jok antamako rite ringjok ine agana. Mi dongjani giminan, uamang wa∙a ja∙tingoni ritimdobaenggipa wa∙a bi∙sakon mi dake cha∙aha. Ua somoio uamang, miko man∙jae, wa∙ako mi dake cha∙ahani giminsa, mini pal cha∙gipa wa∙a ba  miwa mingbaaha ine agana. Chasongrang dingtangroroe, gam∙atanirang dingtangroroe, da∙ode miwako me∙a inesa mingskaaha ine agana. Uandake, akgal-karap ong∙aniara Teksragre songoba ong∙aha. Unomiting uamangoni, mitam mitam manderang uamangni songdong-a∙chachenggipa biaponi salaramchipakko a∙ba o∙e, unon songdong-a∙chachengaha. Uno uamangni songdong-a∙chaon, pilakan kangal ong∙ani gimin, maming mal ba cha∙a-ringanikon donmanjachim. Saniba ang∙ke am∙e ra∙baoba, na∙tik am∙oba, mi∙wa den∙oba cha∙ue kattokaiachim. Saoba saniba mi∙wa den∙baako, me∙bitchi akbaako, antama kange donako saoba cha∙uangoba, ukoba sakgipinan cha∙uroroaiachim. Cha∙uange cha∙uange, bon∙chote cha∙ugipasa jekoba cha∙man-ringmanaiachim ine agana. Uamang saksa sakgipinni me∙su-samjak aro mal-gamrangko cha∙urongani gimin, uamangni donggipa biapko, Jak namgijagiparang ba cha∙una nalgiparangni song inani pal Jakgonggil ine minge minge, ja∙manode ua gittimko Jakgonggil Gittim ine mingbaaha; bilsi ru∙utani ja∙manode, uko Jakgonggil ine minggija, Jakonggre inesa mingskajok ine, me∙apa-chagitchamrang agana.

(Chu∙gimikko, Teksragre Mondoli Golden Jubilee-ni Souvenir-o man∙gen)